काठमाडौँ । काठमाडौँ महानगरपालिकाकी कार्यवाहक प्रमुख सुनिता डंगोलले महिला समानता कुनै उपहार वा टोकन नभई नैसर्गिक मानव अधिकार भएको बताएकी छन्। अन्तर्राष्ट्रिय महिला दिवसको अवसरमा आयोजित कार्यक्रममा उनले समाजमा अझै पनि महिलाको क्षमतामाथि प्रश्न उठाउने विभेदपूर्ण मानसिकता कायम रहेको भन्दै यस सोचको अन्त्य हुनु आवश्यक भएको बताइन् ।
डंगोलले समाजमा दोहोरो मापदण्ड प्रचलित रहेको गुनासो गर्दै भनिन्, “पुरुषहरुलाई शुरुमै सक्षम भनेर लिइन्छ, कामले असक्षम नदेखाएसम्म उनीहरु सक्षम नै मानिन्छन्। तर महिलाहरुलाई भने जबसम्म कामले पुष्टि गर्दैन, तबसम्म असक्षम नै भनिरहने प्रवृत्ति छ। जबसम्म यो सोचको अन्त्य हुँदैन, तबसम्म महिला दिवस जस्ता दिनहरुले हामीलाई सम्झाइरहनुपर्छ कि महिलाहरु पनि उत्तिकै सक्षम छन्।”
उहाँले प्रविधिको विकाससँगै महिलामाथि हुने हिंसाको स्वरुप परिवर्तन भएकोमा चिन्ता व्यक्त गर्दै विशेषगरी सामाजिक सञ्जाल र आर्टिफिसियल इन्टेलिजेन्स (एआई)को दुरुपयोगले महिलामाथि ‘नदेखिने हिंसा’ बढिरहेको उल्लेख गर्नुभयो। डंगोलले भनिन्, “कोही व्यक्ति मन नपरेको कारण वा व्यक्तिगत रिसइबीका कारण सामाजिक सञ्जालमा महिलालाई होच्याउने, चरित्र हत्या गर्ने र भ्रामक सामग्री फैलाउने काम भइरहेको छ। यसलाई समाज बिथोल्ने कार्यको रुपमा लिनुपर्छ। एआई जस्ता आधुनिक प्रविधिको सकारात्मक पक्ष भए पनि महिलाविरुद्ध भ्रामक सामग्री बनाउन यसको दुरुपयोग भइरहेको छ।”
महिलाको विषय केवल महिलासँग सीमित नभई सम्पूर्ण समाज र पुरुषहरुको पनि विषय भएको उल्लेख गर्दै उनले यस्ता विभेदपूर्ण अभिव्यक्ति र क्रियाकलापहरु सोचबाटै निर्मूल पार्नुपर्ने आवश्यकता औंल्याइन् ।
