काठमाडौँ । कास्की निर्वाचन क्षेत्र नम्बर २ बाट प्रतिनिधि सभा सदस्यमा निर्वाचित राष्ट्रिय स्वतन्त्र पार्टीका उत्तमप्रसाद पौडेलले जेन–जी आन्दोलनको मर्मअनुसार काम गर्ने प्रतिबद्धता व्यक्त गरेका छन् ।
प्रतिनिधि सभा सदस्यमा निर्वाचित भएको प्रमाणपत्र ग्रहण गर्ने क्रममा उनले निर्वाचनले दिएको जनादेशलाई नेपाली जनता र देशको हितमा प्रयोग गर्ने बताएका हुन् । देशलाई निकास दिनु आजको मुख्य आवश्यकता भएको उल्लेख गर्दै पौडेलले सबै पक्षलाई समेटेर अघि बढ्ने प्रतिबद्धता व्यक्त गरे।
उनले आफूलाई मत दिने र नदिने सबै नागरिकको प्रतिनिधित्व हुनेगरी काम गर्ने पनि बताए ।
पौडेलले भने, “जित–हार फरक कुरा हो, तर देशलाई निकास दिनु आजको आवश्यकता हो। जेन–जी आन्दोलनपछि भएको यो निर्वाचनले दिएको जनादेशको मर्म बुझेर आम नेपाली नागरिक र नेपालको हितमा काम गर्नेछु। मतदान गर्ने सम्पूर्ण मतदातालाई धन्यवाद दिन चाहन्छु। जसले मतदान गर्नुभएन, उहाँहरूको पनि प्रतिनिधित्व हुनेगरी आगामी पाँच वर्ष काम गर्ने प्रतिबद्धता जनाउँछु।”
कास्की क्षेत्र नम्बर २ मा पौडेलले ३१ हजार ९११ मत प्राप्त गर्दै प्रतिनिधि सभा सदस्यमा निर्वाचित भएका हुन् । उनले निकटतम प्रतिद्वन्द्वी नेकपा (एमाले)की रश्मि आचार्यले ७ हजार ४९३ मत प्राप्त गरेका हुन्।
यसैगरी नेपाली काँग्रेसका माधवप्रसाद बाँस्तोलाले ६ हजार ५००, राप्रपाका हेमजङ गुरुङले १ हजार ६४३, नेपाल कम्युनिष्ट पार्टीका हेमबहादुर थापा पराजुलीले १ हजार २७६ र उज्यालो नेपाल पार्टीका कुशल गुरुङले १ हजार २०१ मत प्राप्त गरेका छन्।
उक्त निर्वाचन क्षेत्रमा कुल ५२ हजार ५१९ मत खसेको थियो।
