काठमाडौँ । राष्ट्रिय स्वतन्त्र पार्टी (रास्वपा) ले प्रतिनिधिसभा सदस्य निर्वाचनको मतपरिणाम आउन बाँकी रहेको अवस्थामा पार्टीका सबै तहका नेता–कार्यकर्तालाई धैर्यतापूर्वक अन्तिम परिणामको प्रतीक्षा गर्न आग्रह गरेको छ।
पार्टीको केन्द्रीय अनुशासन आयोगका कार्यवाहक प्रमुख रमाकान्त रिमालले शनिबार एक अपिल जारी गर्दै निर्वाचनबाट प्राप्त जनादेशलाई जिम्मेवारीका रूपमा ग्रहण गर्नुपर्ने उल्लेख गरेका छन्। उनले जनताको अभिमतलाई उच्च मूल्याङ्कन गर्दै विजय उन्मादभन्दा जिम्मेवार र जवाफदेही ढंगले काम गर्नु पार्टीपंक्तिको कर्तव्य भएको बताएका छन्।
फाल्गुन २१ गते सम्पन्न प्रतिनिधिसभा सदस्य निर्वाचनको पूर्ण परिणाम आउन अझै केही समय लाग्ने भएकाले पार्टीका सबै सदस्यलाई संयमित रहन आयोगले आग्रह गरेको छ।
अनुशासन आयोगले निर्वाचनको यस संवेदनशील घडीमा पार्टीका विभिन्न पंक्तिबाट सामाजिक सञ्जाललगायत माध्यममा अनावश्यक टिप्पणी तथा गतिविधि बढेकोप्रति पनि ध्यानाकर्षण गराएको छ।
यस्ता गतिविधि नगर्न र नगराउन पार्टीपंक्तिलाई निर्देशन दिँदै आयोगले त्यस्तो कार्य भएमा पार्टीको विधान, कार्यविधि तथा आचारसंहिताअनुसार आवश्यक कारबाही गरिने चेतावनी दिएको छ।
लोकतान्त्रिक मूल्य–मान्यताको संरक्षण गर्दै सभ्य र अनुकरणीय राजनीतिक अभ्यास गर्नुपर्नेमा जोड दिँदै आयोगले निर्वाचन शान्तिपूर्ण रूपमा सम्पन्न हुने अन्तिम चरणमा पुगेकोप्रति सबै सरोकारवालालाई धन्यवादसमेत दिएको छ। साथै आयोगले पार्टीको आधिकारिक निर्देशनबिना कुनै पनि गतिविधि नगर्न पार्टीपंक्तिलाई आग्रह गरेको छ।
