मुगु। प्रतिनिधिसभा सदस्य निर्वाचन अन्तर्गत मतदान शान्तिपूर्ण रूपमा सम्पन्न भएको छ ।
निर्वाचन कार्यालयका अनुसार मतदान गर्ने अन्तिम समय बेलुका ५ः०० बजेसम्म जिल्लाभर कुल २२ हजार ११५ मत खसेको छ ।
मुख्य निर्वाचन अधिकृतको कार्यालयका सहायक निर्वाचन अधिकृत तथा सूचना अधिकारी प्रेमराज खनियाँका अनुसार खसेको मतमध्ये ११ हजार ५८४ महिला र १० हजार ३३१ पुरुषको रहेको छ । जिल्लामा कुल ६१ दशमलव ३८ प्रतिशत मत खसेको पनि सूचना अधिकारी खनियाँले जानकारी दिनुभयो ।
जिल्लाभरि ३६ हजार ३१ मतदाता भए पनि प्रत्यक्षतर्फमा १३ हजार ९१६ मतदाता मतदान गर्न आएनन् ।
जिल्लाभर कायम गरिएका मतदान केन्द्रमा बिहानदेखि नै मतदाताको उल्लेख्य उपस्थितिसहित मतदान प्रक्रिया शान्तिपूर्ण रूपमा सम्पन्न भएको छ । मतदानका लागि एउटा अस्थायी मतदान केन्द्रसहित ७० मतदान केन्द्र र ६७ मतदानस्थल कायम गरिएको थियो । रासस
