काठमाडौं । रक्षा मन्त्रालय अन्तर्गतको नेपाली सेना ले आसन्न प्रतिनिधि सभा निर्वाचनलाई लक्षित गर्दै प्रसारित भ्रामक तथा अतिरञ्जित सामग्रीप्रति गम्भीर ध्यानाकर्षण भएको जनाएको छ।
बुधबार बेंगी अड्डास्थित जनसम्पर्क तथा सूचना निर्देशनालयले प्रेस विज्ञप्ति जारी गर्दै संविधानले प्रदान गरेको जिम्मेवारी तथा अन्य कर्तव्यहरू नेपाली सेनाले सम्बन्धित निकायहरूसँग समन्वय र सहकार्यमा कुशलतापूर्वक सम्पन्न गर्दै आएको उल्लेख गरेको छ। विज्ञप्तिमा आसन्न निर्वाचन सुरक्षित रूपमा सम्पन्न गर्न एकीकृत सुरक्षा योजना अनुरूप नेपाली सेना गैर–राजनीतिक चरित्र कायम राख्दै आवश्यक समन्वयका साथ परिचालन भइरहेको स्पष्ट पारिएको छ।
सेनाले प्रतिनिधि सभा निर्वाचनलाई निष्पक्ष, स्वतन्त्र र भयरहित वातावरणमा सम्पन्न गराउन सबै सुरक्षा निकाय तथा सरोकारवाला पक्षहरू एकीकृत र समन्वयात्मक ढङ्गले सक्रिय रहेको जनाएको छ। यस्तो अवस्थामा असान्दर्भिक र अतिरञ्जित सामग्रीहरू सुनियोजित रूपमा प्रसारित भइरहेकोप्रति सेनाले आपत्ति जनाएको छ।
भ्रामक सूचनाले आम नागरिकमा भ्रम सिर्जना गर्न सक्ने भन्दै त्यस्ता सामग्रीमा विश्वास नगर्न तथा नगराउन सेनाले सर्वसाधारणमा हार्दिक अपिल गरेको छ।
