काठमाडाैँ । कार्यालय बिदा परेका दिनमा पनि रसुवा जिल्ला अदालतले न्याय सम्पादनको कार्यलाई निरन्तरता दिने भएको छ। अदालतले सार्वजनिक गरेको सूचनाअनुसार यही फागुन २०, २२ र २४ गते कार्यालय बिदा रहे पनि बन्दी प्रत्यक्षीकरणसम्बन्धी निवेदनको सुनुवाइ नियमित रूपमा गरिनेछ।
अदालतका अनुसार उक्त अवधिमा बन्दी प्रत्यक्षीकरणका मुद्दाका साथै जिल्लाभित्र कुनै अप्रिय घटना घटेमा पक्राउ पुर्जी जारी गर्ने, पक्राउ परेका व्यक्तिका लागि थुनुवा म्याद थप गर्ने लगायतका अत्यावश्यक न्यायिक कार्यसमेत सञ्चालन गरिनेछ। बिदाका दिनमा पनि नागरिकको मौलिक अधिकार संरक्षण र कानुनी प्रक्रिया अवरुद्ध नहोस् भन्ने उद्देश्यले यस्तो व्यवस्था मिलाइएको अदालतले जनाएको छ।
यसैबीच, जिल्ला प्रशासन कार्यालय रसुवाले भयरहित वातावरणमा आम निर्वाचन सम्पन्न गराउने उद्देश्यले उत्तरी नाका अस्थायी रूपमा बन्द गर्ने निर्णय गरेको छ। प्रशासनले जारी गरेको सूचनाअनुसार रसुवागढी नाका अन्तर्गत पर्ने ल्हेन्देखोलास्थित मितेरी पुल फागुन २१ गते अपराह्न ५ बजेसम्मका लागि बन्द गरिएको छ।
सहायक प्रमुख जिल्ला अधिकारी तथा सूचना अधिकारी द्रुवप्रसाद अधिकारीका अनुसार निर्वाचन अवधिमा सुरक्षा सतर्कता बढाइएकाले सीमा क्षेत्रमा आवतजावतमा अस्थायी रोक लगाइएको हो। प्रशासनले नागरिकलाई वैकल्पिक व्यवस्था मिलाएर मात्र यात्रा गर्न अनुरोध गरेको छ।
