काठमाडौं । नेपाल आयल निगमले पेट्रोलियम पदार्थको मूल्य बढाएको छ । बिहीबारदेखि लागु हुने गरी पेट्रोल, डिजेल र मट्टितेलको खुद्रा मूल्यमा प्रतिलिटर दुई रुपैयाँ बढाएको हो । भारतीय आयल निगमले पठाएको नयाँ मूल्य सूचीअनुसार इन्धनको मूल्य बढेको निगमले जनाएको छ । ‘जनवरी १ मा प्राप्त नयाँ मूल्य अनुसार अन्तर्राष्ट्रिय बजारमा मूल्य बढेको छ,’ निगमका प्रवक्ता वीरेन्द्र गोइतले भने, ‘स्वाचालित मूल्य सूचीअनुसार इन्धनको मूल्य समायोजन गर्दा पेट्रोल/डिजेल र मट्टितेलमा प्रतिलिटर २ रुपैयाँ बढेको छ ।’
हवाई इन्धन र खाना पकाउने एलपी ग्याँसको मूल्यमा भने कुनै पनि परिवर्तन नगरिएको निगमका प्रवक्ता गोइतले जानकारी दिए । नयाँ मूल्यअनुसार डिपो र बिक्री बिन्दुदेखि १५ किलोमिटर क्षेत्रभित्र पेट्रोलको खुद्रा बिक्री मूल्य काठमाडौं (थानकोट), सुर्खेत र दिपायलमा १ सय ११ रुपैयाँ प्रति लिटर कायम हुनेछ । त्यसैगरी पोखरा, दाङमा १ सय १० रुपैयाँ ५० पैसा प्रति लिटर हुने र अन्य तराई क्षेत्रमा १ सय ९ रुपैयाँ ५० पैसा निर्धारण गरेको निगमले जनाएको छ ।
डिजेल/मट्टितेलको खुद्राबिक्री मूल्य १ सय रुपैयाँ निर्धारण गरिएको छ । त्यस्तै, डिजेल/मट्टितेलको मूल्य पोखरा, दाङको लागि ९९ रुपैयाँ ५० पैसा र अन्य तराई क्षेत्रका लागि ९८ रुपैयाँ ५० पैसा तोकेको निगमले जनाएको छ । सौर्य दैनिकबाट
