काठमाडाैँ । डक्टरस विदाउट बोर्डर्स (एमएसएफ) पछिल्लो समयमा दक्षिण सुडानमा हिंसा बढेपछि आफ्ना २६ जना कर्मचारीहरू बेपत्ता भएको सोमबार बताएको छ । “लन्किएन र पियेरीमा काम गर्ने २९१ एमएसएफ सहकर्मीहरू मध्ये २६ जना हिंसाका कारण बेपत्ता रहेको पुष्टि गर्दै चरम असुरक्षाको बीचमा उनीहरूसँग सम्पर्क गुमाएको विज्ञप्तिमा उल्लेख गरिएको छ ।
एमएसएफले जोङ्लेई राज्यका लन्किएन र पियेरीमा चिकित्सा सेवाहरू स्थगित गरेको छ, जहाँ डिसेम्बर देखि सरकार र विपक्षी सेनाहरू बिच ठूलो झडप भएको छ ।
लन्किएनमा रहेको एमएसएफ सुविधा फेब्रुअरी– ३ मा सरकारी हवाई आक्रमणबाट प्रभावित भएको जनाइएको छ । धेरै कर्मचारीहरू आफ्नो परिवारसँगै भाग्न बाध्य भई धेरैजना विस्थापित भइ खाना, पानीलगायतका आधारभूत सेवाहरूमा पहुँच नभएका दुर्गम क्षेत्रहरूमा शरण लिइरहेको विज्ञप्तिमा उल्लेख गरिएको छ ।
विश्वको सबै भन्दा कान्छो देश दक्षिण सुडान सन् २०११ मा गठन भएदेखि नै गृहयुद्ध, गरिबी र ठूलो भ्रष्टाचारले ग्रस्त छ ।
संयुक्त राष्ट्र सङ्घले राष्ट्रपति साल्वा किर र उहाँका लामो समयका प्रतिद्वन्द्वी रीक मचारबिचको शक्ति बाँडफाँड सम्झौता गत वर्ष बिग्रँदै जाँदा “पूर्ण गृहयुद्ध“ मा फर्कने चेतावनी दिएको छ ।
यसै बिच संयुक्त राष्ट्र संघले आइतवार सुडानको सीमा नजिकै अबीम्नोममा बढ्दो हिंसाका कारण दर्जनौँ नागरिक तथा स्थानीय अधिकारीहरूको मृत्यु भएको बताएको छ ।
