काठमाडाैँ । ताप्लेजुङकाे मैवाखोला गाउँपालिकाले उन्नत जातका किबीका बिरुवा वितरण गरेको छ। ‘एक घर एक फलफूल बगैँचा विकास’ कार्यक्रमअन्तर्गत गाउँपालिकाभित्रका किसानलाई बिरुवा उपलब्ध गराइएको हो।
गाउँपालिकाका कृषि शाखा प्रमुख सुरेन्द्र राईका अनुसार इलाम जिल्लाबाट खरिद गरी हे–वार्ड जातका किबीका बिरुवा वितरण गरिएको हो। किबीखेती गर्न इच्छुक किसानबाट आवेदन आह्वान गरी प्राप्त निवेदनका आधारमा बिरुवा खरिद गरिएको र त्यसैअनुसार वितरण गरिएको उनले जानकारी दिए।
आवश्यकता र उपलब्धताका आधारमा प्रत्येक किसानलाई ३० देखि १०० वटासम्म बिरुवा उपलब्ध गराइएको छ। किबीखेतीका लागि ३३ जना किसानले आवेदन दिएका थिए र सबै आवेदकलाई बिरुवा वितरण गरिएको राईले बताए।
गाउँपालिकाका अध्यक्ष विजयप्रकाश वनेमले ‘एक घर एक फलफूल बगैँचा’ अभियानमार्फत स्थानीयस्तरमै व्यावसायिक फलफूल उत्पादन विस्तार गर्ने उद्देश्यले कार्यक्रम सञ्चालन गरिएको बताए।
किबीका बिरुवा लिने किसानलाई अन्य प्रजातिका बिरुवा नदिइने स्पष्ट पार्दै उनले वितरण गरिएका बिरुवाको नियमित अनुगमन र आवश्यक प्राविधिक सहयोग गाउँपालिकाले उपलब्ध गराउने जानकारी दिए।
उनका अनुसार किसानले लगेको बिरुवाको उचित स्याहार–सुसार नगरेमा वा समयमै रोपाइँ नगरेमा गाउँपालिकाबाट प्रदान गरिने सेवा–सुविधा रोक्का गर्न सकिनेछ। उत्पादित किबीको बजारीकरणका लागि पनि गाउँपालिकाले सहजीकरण गर्ने जनाएको छ।
यस कार्यक्रमले स्थानीयस्तरमा व्यावसायिक किबीखेती विस्तार गर्नुका साथै किसानको आयआर्जन वृद्धि गर्न महत्वपूर्ण टेवा पुग्ने अपेक्षा गरिएको छ।
