काठमाडाैँ । पाकिस्तान सरकारले अफगानिस्तान सीमासँग जोडिएका सात वटा उग्रवादी शिविरहरूमा गुप्तचर सूचनाका आधारमा लक्षित आक्रमण गरेको जनाएको छ।
सूचना तथा प्रसारण मन्त्रालयले आइतबार बिहान जारी गरेको विज्ञप्तिमा हालै भएका आत्मघाती बम विस्फोटहरूको प्रतिकारस्वरूप उक्त कदम चालिएको उल्लेख गरिएको छ।
मन्त्रालयका अनुसार इस्लामाबादस्थित एक मस्जिदमा भएको आत्मघाती आक्रमणसहित पछिल्ला बम विस्फोटहरू अफगानिस्तानमा आधार बनाएका उग्रवादी समूहहरूको निर्देशनमा भएका थिए। ती घटनाहरूको जिम्मेवारी तेहरिक–ए–तालिबान पाकिस्तान (टीटीपी) का विभिन्न गुट तथा इस्लामिक स्टेट खोरासान प्रान्त (आईएसकेएपी) ले लिएका छन्।
पाकिस्तानले यसअघि पनि अफगान सरकारसँग आफ्नो भूमिलाई पाकिस्तानविरुद्ध आक्रमण गर्न प्रयोग हुन नदिन ठोस कदम चाल्न पटक–पटक आग्रह गर्दै आएको दाबी गरेको छ। तर त्यसतर्फ प्रभावकारी कारबाही नभएको मन्त्रालयको भनाइ छ।
यही पृष्ठभूमिमा पाकिस्तानले प्रतिकारात्मक कदमस्वरूप गुप्तचर सूचनामा आधारित छनोटात्मक आक्रमण गरी टीटीपी, यसका सम्बद्ध समूहहरू तथा आईएसकेएपीका सात वटा आतंकवादी शिविर र लुक्ने स्थानहरूमा सटीक ढंगले प्रहार गरेको विज्ञप्तिमा उल्लेख छ।
सरकारले क्षेत्रीय शान्ति र स्थिरताका लागि निरन्तर प्रयासरत रहेको दाबी गर्दै नागरिकको सुरक्षा आफ्नो सर्वोच्च प्राथमिकता भएको स्पष्ट पारेको छ। यस महिनाभरि इस्लामाबादको मस्जिद विस्फोटसहित उत्तरपश्चिमी जिल्लाहरू बाजौर र बन्नुमा भएका आक्रमणले पाकिस्तानमा राष्ट्रिय सुरक्षासम्बन्धी चिन्ता बढाएको सरकारी भनाइ छ।
