बैंकक/चियाङ माई : उत्तरी थाइल्यान्डस्थित एक निजी पशु पार्कमा घातक भाइरस र ब्याक्टेरिया संक्रमणका कारण कम्तीमा ७२ वटा बाघको मृत्यु भएको छ।
चियाङ माईको प्रान्तीय पशुधन कार्यालयले जारी गरेको विज्ञप्तिअनुसार मृत बाघमा गरिएको परीक्षणबाट अत्यधिक सङ्क्रामक क्यानाइन डिस्टेम्पर भाइरसका साथै श्वासप्रश्वास प्रणालीमा असर गर्ने ब्याक्टेरियाको संक्रमण पुष्टि भएको हो।
राष्ट्रिय पशुधन विभागका निर्देशक सोमचुआन रतनमुङक्लानोनले स्थानीय सञ्चारमाध्यमलाई बताएअनुसार बाघमा देखिने स्वास्थ्य समस्या अन्य जनावरको तुलनामा ढिलो पहिचान हुने भएकाले परीक्षण गर्दा धेरै ढिलो भइसकेको थियो। त्यसैले संक्रमित बाघको ज्यान बचाउन नसकिएको उनले बताए।
पार्कको वेबसाइटमा उपलब्ध जानकारी उद्धृत गर्दै पशु अधिकारसम्बन्धी संस्था PETA Asia लाई उल्लेख गर्दै एएफपीले जनाएअनुसार बाघहरू समयमै परीक्षण र उचित उपचार नपाउँदा पीडा र त्रासका बीच मरेका थिए।
घटनापछि सम्बन्धित निकायले पार्कमा रहेका अन्य जनावरको स्वास्थ्य निगरानी बढाएको तथा संक्रमण नियन्त्रणका लागि आवश्यक कदम चालिएको जनाइएको छ।
