काठमाडौं । आईसीसी पुरुष टी–२० विश्वकप क्रिकेट, २०२६ अन्तर्गत वेस्टइन्डिजविरुद्धको खेलमा नेपालले पहिले ब्याटिङ सुरु गरेको छ ।
भारतको मुम्बईस्थित वानखडे स्टेडियममा टस हारेर नेपालले ब्याटिङको निम्तो पाएको हो । नेपालले जारी विश्वकपमा समूह चरणको यो तेस्रो खेल खेल्दै छ ।
समूह चरणका खेलमा लगातार दोस्रो हार बेहोरेको नेपाललाई आज जित्नै पर्ने दबाब छ । नेपाल यसअघि इङ्ल्यान्ड र इटालीसँग पराजित भएको थियो ।
वेस्टइन्डिज दुईपटकको बिश्वकप बिजेता टिम हो । वेस्टइन्डिजले सन् २०१२ र २०१६ मा टी–२० विश्वकपको उपाधि जितेको थियो ।
नेपाली टोलीमा आज एक खेलाडी परिवर्तन गरिएको छ । ललित राजवंशीको स्थानमा सोमपाल कामीलाई समेटिएको छ । नेपालको प्लेइङ–११ मा कुशल भुर्तेल, आशिफ शेख, कप्तान रोहित पौडेल, दीपेन्द्रसिंह ऐरी, आरिफ शेख, लोकेश बम, गुलशन झा, सोमपाल कामी, करण केसी, नन्दन यादव र सन्दीप लामिछाने छन् ।
त्यस्तै वेस्ट इन्डिजको प्लेइङ ११ मा शाइ होप, ब्रान्डन किंग, सिम्रोन हेटमायर, रोस्टन चेस, रोभम्यान पावेल, शरफेन रदरफोर्ड, जेसन होल्डर, म्याथ्यु फोर्डे, गुडाकेश मोटी, अकिल होसेन र शमर जोसेफ छन् ।।
भारत पाकिस्तान भिडन्त पनि आजै
यस विश्वकपमा अर्को सर्वाधिक चर्चित खेल भारत र पाकिस्तान बिच आज श्रीलंकाको कोलम्बो स्थित आर प्रेमदासा स्टेडियममा हुँदैछ । भारतसँग खेल्ने कि नखेल्ने भन्ने द्विविधा बिच पाकिस्तानी टिम श्रीलंका पुगेको छ ।
यो म्याच साँझ ७.१५ बजे सुरु हुँदैछ । यी दुबै टिमले दुई दुई म्याच खेलेर चार चार अंक बटुलेका छन् । यहाँ पनि जुन टिमले आजको खेल जित्छ ऊ सुपर ८ मा पुग्नेछ ।
नामिबिया युएसएको खेल
तेस्रो खेल समूह ए कै युएसए र नामिबिया बिच हुनेछ । भारतको चेन्नाईमा हुने यो खेल अपराह्न ३.१५ बजे सुरु हुनेछ । सुपर ८ मा पुग्न युएसएको सम्भावना रहेकाले उसले निकै मिहिनेतका साथ खेल खेल्ने अपेक्षा गरिएको छ ।
यही समूहमा रहेका भारत र पाकिस्तान अविजित रहेकाले युएसएको सम्भावना क्षीण नै मान्न सकिन्छ ।
