काठमाडौँ। नेपाली कांग्रेसका महामन्त्री प्रदीप पौडेलले आन्तरिक रूपमा रूपान्तरण भएर आएको कांग्रेस देश रूपान्तरणको स्पष्ट आधारसहित अगाडि बढेको बताउनुभएको छ ।
नेविसङ्घ गोरखा–काठमाडौँ सम्पर्क समितिले आज यहाँ आयोजना गरेको पार्टी सदस्य एवम् शुभेच्छुक भेटघाट कार्यक्रममा उहाँले बदलिएको कांग्रेसले पार्टीलाई एकताबद्ध गर्दै देश बदल्ने बताउनुभएको हो ।
“विशेष महाधिवेशनले कांग्रेस नयाँ बनेको होइन, रूपान्तरित भएर आएको हो । अब रूपान्तरित कांग्रेसले देशको रूपान्तरण गर्नेछ । रूपान्तरणको अर्थ हाम्रा नीति, सिद्धान्त र व्यवहारले पुष्टि गर्ने हो”, महामन्त्री पौडेलले भन्नुभयो,“पार्टीले एक व्यक्ति दुई पटकसम्म प्रधानमन्त्री हुने, सांसद्, मन्त्रीको समयरेखाको कुरा गरेका छौँ । निर्वाचनअघि गठबन्धन नगर्नेलगायत नीति अगाडि सारेका छौँ । त्यसैकारण यसपटक सबैले आफ्नो आस्थाको पार्टी र चुनाव चिन्हमा मतहाल्ने अवस्था बनेको छ । भविष्यमा अरु प्रभाव देखिने नै छन् ।”
उहाँले गत भदौ २३ र २४ गते भएको जेनजी आन्दोलनमा भ्रष्टाचार अन्त्य र सुशासन मुख्य माग रहेको उल्लेख गर्दै ती मागको सम्बोधन कांग्रेसले पूरा गर्ने जिकिर गर्नुभयो । भ्रष्टाचार अन्त्यका लागि आर्थिक कारोबारलाई प्रविधिमैत्री बनाउनुपर्नेमा जोड दिँदै महामन्त्री पौडेलले कांग्रेसले सार्वजनिक गर्न लागेको प्रतिबद्धतापत्रमा भ्रष्टाचारको अन्त्य, सुशासन कायम, स्वदेशमा रोजगारी सिर्जना, डिजिटल मुलुक निर्माणलाई उच्च प्राथमिकतामा राखेको बताउनुभयो ।
गोरखा क्षेत्र नं २ का उम्मेदवार प्रकाशचन्द्र दवाडीले गोरखाको विकास र मुलुकको समृद्धिका लागि कांग्रेसको जीत आवश्यक रहेको बताउनुभयो । आफूले १५ वर्षदेखि निरन्तर समाजसेवा गर्दै आएको उल्लेख गर्दै उहाँले जनताको सेवा गर्न समाजसेवा र राजनीतिलाई सँगै अगाडि बढाउने बताउनुभयो ।
कांग्रेस गोरखा क्षेत्र नं १ का उम्मेदवार प्रेम खत्रीले राष्ट्रिय समस्याको रूपमा रहेको बुढीगण्डकी जलविद्युत् आयोजनालाई आफूले उच्च प्राथमिकतामा राखेको बताउनुभयो ।
कार्यक्रममा कांग्रेसका पुराना नेता चिरञ्जीवी वाग्ले, कमला पन्त, अब्दुल सत्तार, किरणबाबु श्रेष्ठ, कांग्रेस गोरखा जिल्ला सभापति एवम् प्रदेशसभा सदस्य नन्दप्रसाद न्यौपानेलगायतले आफ्नो धारणा राख्नुभएको थियो । रासस
