काठमाडौं । नेपाल वायुसेवा निगमका कार्यकारी अध्यक्ष मदन खरेलले पदबाट राजीनामा दिएका छन् । उनलाई केही समय अगाडि स्पष्टीकरणसमेत सोधिएको थियो । खरेलले आइतबार बिहान सिंहदरबारस्थित संस्कृति पर्यटन तथा नागरिक उड्डयन मन्त्रालय पुगेर मन्त्री योगेश भट्टराईसमक्ष राजीनामा बुझाएका हुन् । भट्टराईले मन्त्रालय सम्हाले यता खरेलले निगमलाई फाइदामा पुर्याउन कुनै पनि योजना नबनाएको र कार्यसम्पादन राम्रोसँग गर्न नसकेको आरोप लाग्दै आएको थियो ।
त्यसकारण पनि उनलाई राजीनामाको दबाब रहँदै आएको थियो । नेपाल एयरलाइन्सको ओसाका उडानको निर्णय हतारमा गरेको र घाटा गएको भन्दै खरेलको तीव्र आलोचना हुँदै आएको थियो । पुसको दोस्रो साता खरेललाई स्पष्टीकरण सोधिएको थियो । जसमा प्रधानमन्त्री समक्ष निगमको सञ्चालक समितिको व्यवस्थापनलाई असहयोग गरेको विषयमा कुन एजेन्डामा कसरी असहयोग गरेको भनी सोधिएको थियो ।
त्यस्तै निगमको वाइडबडी सञ्चालन सम्बन्धी तयार पारिएको व्यापारिक योजनामा जापानको टोकियोमा उडान गर्ने योजना रहेको तर, नेपाल जापानबीचको हवाई सम्झौता नवीकरणको दौरानमा टोकियोमा एसएलओटी नपाउने तर, नारितामा पाउने भएपछि नारिताबाट ओसाका उडान नगर्नुको कारण र ओसाका उडान गर्दा पुग्न गएको क्षतिको जवाफदेही को हुन्छ भनी प्रश्न सोधिएको थियो ।
साथै, निगम सञ्चालक समितिको बैठकले वाइ १२ ई र एमए ६० विमान सञ्चालनका लागि व्यवस्थापनको प्रतिबद्धता सहितको कार्ययोजना पेस गर्न व्यवस्थापनलाई दिएको निर्देशनलाई नजरअन्दाज गरी हालसम्म कुनै पनि कार्ययोजना पेस नगर्नुको कारण के हो ?, एयरबस ३२० विमानको इन्जिन एआरओको सम्बन्धमा दिइएको निर्देशन कार्यान्वयनको अवस्थामा र एअरबस ३३० विमानको पीबीएच सम्झौताको अवस्था के छ ?
र एअरबस ३२० विमानको एपीयु बिग्रको सम्बन्धमा के भएको हो र यसको हालको अवस्था के छ, के यो स्वभाविक हो भन्दै ५ बुँदे स्पष्टीकरण सोधिएको थियो । राजीनामा बुझाएका खरेल आइतबार नै अस्ट्रेलिया प्रस्थान गरेका छन् ।
खरेललाई २०७५ भदौमा मन्त्रिपरिषद् बैठकले अध्यक्षमा नियुक्त गरेको थियो । निगमको सञ्चालक समितिको अध्यक्ष उड्डयन मन्त्रालयका सचिव हुने व्यवस्था रहेपनि प्रधानमन्त्री केपी शर्मा ओलीले खरेललाई कार्यकारी अध्यक्ष बनाएका थिए । सौर्य दैनिकबाट
