धनगढी। सुदूरपश्चिम प्रदेशसभाको पाँचौं अधिवेशन आज सोमबारदेखि सुरु हुँदै छ । प्रदेश प्रमुख शर्मिलाकुमारी पन्तले आह्वान गरे अनुसार प्रदेशसभाको पाँचौं अधिवेशन आज दिउँसो २ बजे देखि सुरु हुन लागेको हो । हिउँदे अधिवेशन पनि भनिने पाँचौं अधिवेशन मुलतः विधेयक अधिवेशन हो । विधेयक अधिवेशनको सुरुवात सोमबार हुन गइरहेको भए पनि सरकारका तर्फबाट अधिवेशनमा प्रस्तुत गर्नका लागि आइतबारसम्म एउटा मात्रै विधेयक प्रदेशसभा सचिवालयमा दर्ता भएको छ ।
सरकारले दर्ता गरेको सो विधेयकसमेत हिउँदे अधिवेशनको पहिलो दिन सभामा पेस हुने छैन । प्रदेशसभा सचिवालयमा दर्ता भएको पाँच दिनपछि मात्रै सभामा टेबुल गर्न पाइने प्रदेशसभा नियमावलीको प्रावधानअनुसार सो विधेयक सोमबारको सभा बैठकमा टेबुल हुनेछैन । सरकारले २ माघमा एफएम रेडियो तथा टेलिभिजन प्रशारणसम्बन्धी व्यवस्था गर्न बनेको विधेयक २०७६लाई प्रदेशसभा सचिवालयमा दर्ता गराएको छ । प्रदेशसभा सचिवालयका प्रवक्ता सिद्धराज चटौतका अनुसार २ माघमा दर्ता भएको विधेयक मंगलबार मात्रै पाँच दिन पुग्नेछ ।
यसैबीच, झन्डै ६ महिनापछि सञ्चालन हुन लागेको प्रदेशसभाको हिउँदे अधिवेशनमा सरकारलाई घेर्ने रणनीतिमा प्रमुख प्रतिपक्षी दल रहेको छ । सोमबारदेखि सुरु हुन लागेको हिउँदे अधिवेशनमा प्रमुख प्रतिपक्षी दलले भ्रष्टाचारका मुद्दामा सरकारलाई घेर्ने रणनीति बनाएको हो । सुदूरपश्चिम प्रदेशसभाको प्रमुख प्रतिपक्षी दल नेपाली कांग्रेसले प्रदेश सरकारका विभिन्न मन्त्रालय तथा मातहतका कार्यालयले विभिन्न खरिद प्रक्रियामा गरेको आर्थिक अनियमिततालाई प्रमुखताका साथ सभा बैठकमा मुद्दा बनाउने संकेत दिएको छ ।
प्रमुख प्रतिपक्षी दलका नेता डा. रणबहादुर रावलले पछिल्लो पटक सञ्चारमाध्यममा आएका समाजिक विकास मन्त्रालयको एम्बुलेन्स खरिद, विभिन्न जिल्लामा भएका स्वास्थ्य शिविरका नाममा भएको अनियमितता र सोही मन्त्रालय मातहतको स्वास्थ्य निर्देशनालयका औषधी तथा उपकरण खरिदलगायत अन्य मन्त्रालयका अनियमितताबारे सशक्त रूपमा आवाज उठाउने र सरकारको जवाफ मागिने बताए । राजधानी दैनिकबाट
