काठमाडौं । नेपाली कांग्रेसका नेता एवम राष्ट्रियसभाका सांसद रमेशजंग रायमाझीको सम्पत्ति छानविन गर्ने पर्ने माग राख्दै उजुरी दर्ता भएको छ । रायमाझीले गैरकानुनी रुपमा सम्पत्ति आर्जन गरेको भन्दै अनामनगरका सौजन्य क्षेत्रीले मंगलबार अख्तियार दुरुपयोग अनुसन्धान आयोग र सम्पत्ती शुद्धीकरण अनुसन्धान विभागमा उजुरी दर्ता गराएका हुन् ।
भोजपुरको सामान्य परिवारमा जन्मेका संसद रायमाझीले राजनीतिको आडमा करोडौ अकुत सम्पत्ति आर्जन गरेकाले छानविनको माग गरेर उजुरी दर्ता गराएको क्षेत्रीले बताए । रायमाझीले माघ ५ को राष्ट्रियसभा बैठकबाटै सरकारलाई ५० करोड रुपैयाँ बढी तिर्न तयार भएको भन्दै गोकर्ण रिसोर्ट लिज दिन माग माग गरेका थिए ।
‘राज्यको इज्जत र प्रतिष्ठा माथिनै आँच पुग्ने गरी माथिल्लो सदनबाटै सरकारको खिल्ली उडाएर ५० करोड सम्पत्तिको धाक लगाउनु जायज होइन,’ क्षेत्रीले भने, ‘उनको सम्पत्ति छानविन गरी राज्यकरण गर्नु पर्छ । सांसद रायमाझीले प्रसस्त सम्पत्ति कमाएको कुरा यस अघि नेपाली सञ्चार माध्यममा बारबार सार्वजनिक भई सकेको छ ।
कांग्रेस निकट स्रोतका अनुसार रायमाझीले तत्कालीन गृहमन्त्री खुमबहादुर खड्का जिवित छँदै सत्ता र शक्तिको चरम दुरुपयोग गरि व्यापारिक प्रतिष्ठानका व्यक्तिहरुलाई तर्साएर अकुत सम्पत्ति आर्जन गरेका छन् ।
