काठमाडौं । सरकारले स्कुल बसहरुलाई बिहान नौं बजेभित्र अनिवार्य रुपमा स्कुल कम्पाउण्डभित्र प्रवेश गरिसक्नुपर्ने व्यवस्था गर्न लागेको छ । गत १ माघदेखि नै लागू हुने गरी सरकारले यस्तो नियम बनाउन खोजे पनि सरोकारवालाहरुसँगको सुझाव अनुसार केही समयपछि मात्र यस्तो नियम लगाउनेमा सरकार पुगेको छ । सरकारले काठमाडौं उपत्यकाको ट्राफिक व्यवस्थापन गर्न भन्दै ३७ बुँदे कार्ययोजना पारित गरेको थियो । गत १५ पुसमा बसेको मन्त्रीपरिषद बैठकबाट ‘काठमाडौं उपत्यकाको ट्राफिक व्यवस्थापन सम्बन्धी अल्पकालीन कार्ययोजना २०७६’ पारित भएको हो ।
उक्त कार्ययोजनाको १४ नम्बरमा स्कुल बसहरु बिहान नौं बजेसम्म अनिवार्य रुपमा स्कुलको कम्पाउण्डभित्र प्रवेश गरिसक्ने व्यवस्था मिलाउन शिक्षा, विज्ञान तथा प्रविधि मन्त्रालयलाई जिम्मा तोकेको थियो । सरोकारवाला संघ संस्था तथा निकायले तत्काल यस्तो नियम लागू गर्न कठिन हुने जनाएपछि सरकार तत्कालका लागि पछि हटेको छ । सरकारले आगामी शैक्षिक सत्रदेखि भने यो नियम लागू गर्न लागेको छ । महानगरीय ट्राफिक प्रहरी महाशाखाका प्रमुख एसएसपी भिमप्रसाद ढकालले नौं बजेभित्र बसहरु विद्यालय कम्पाउण्डभित्र छिराईसक्ने व्यवस्था गर्न सबै सकरात्मक भएको भन्दै तयारी भइरहेको जनाए ।
‘यसमा सबैको सहमति छ, अब केही महिनापछि यो नियम लागू हुन्छ,’ उनले भने । स्कुल बसहरु बिहान ९ देखि १० बजेपछि पनि सञ्चालन हुँदै आएका छन् । ‘पिक आवर’ मा स्कुल बस सञ्चालन हुँदा उपत्यकाको ट्राफिक जाम झनै थपिन पुगेको आरोप लाग्ने गरेको छ । निजी तथा आवासीय विद्यालयहरुको संगठन (प्याब्सन) ले नौं बजेभित्र बसहरु स्कुल कम्पाउण्डभित्र छिराउन आफूहरु सहमत भए पनि तत्काल सम्भव नहुने जनाएको छ । प्याब्सनका सह–अध्यक्ष डिके ढुंगानाले आगामी सत्रदेखि यस्तो नियम लगाउने बताए ।
‘अहिले शैक्षिक सत्रको सबैभन्दा व्यस्त समय चलिरहेको छ, आगामी शैक्षिक सत्रदेखि यो नियम लगाउन सकिन्छ,’ सहअध्यक्ष ढुंगानाले भने । सहअध्यक्ष ढुंगानाले अहिले नै नियम लगााउन सकिने भए पनि टिफिन समय, क्यान्टिन समय लगायत तालिका नै प्रभावित हुने भएकाले आगामी शैक्षिक सत्रदेखि लगाउन सकिने बताए । उनले अहिले चक्रपथ भित्र प्राय जसो ९ बजेभित्र नै बसहरु स्कुल कम्पाउण्डभित्र छिरिसक्ने अभ्यास रहँदै आएको समेत जनाए । राजधानी दैनिकबाट
