काठमाडौँ । सामाजिक सञ्जाल तथा विभिन्न मिडियामार्फत तथ्यहीन अभिव्यक्ति, गाली गलौज र बेइज्जती गरेको आरोपमा प्रहरीले युवराज सफललाई पक्राउ गरेको छ।
जिल्ला प्रहरी परिसर काठमाडौंका प्रवक्ता पवनकुमार भट्टराईका अनुसार सफलले महान्यायाधिवक्ताको कार्यालय र महान्यायाधिवक्ताबारे नकारात्मक, अपशब्दयुक्त तथा बेइज्जतीपूर्ण सामग्री सामाजिक सञ्जालमा प्रसारण गरेका थिए।
उनले विभिन्न मुद्दामा रकम लेनदेन गरेर फिर्ता लिने गरेको भनी झूटा आरोप लगाउँदै भिडिओ बनाएको र अन्तर्वार्तामार्फत पनि तथ्यहीन आरोप लगाएको पाइएको प्रहरीले जनाएको छ।
महान्यायाधिवक्ताको कार्यालयबाट प्रमाणसहित पत्राचार प्राप्त भएपछि गरिएको अनुसन्धानका क्रममा सफल (पौडेल)ले तथ्यहीन कुरा सार्वजनिक गरेको देखिएको प्रहरीको भनाइ छ।
पक्राउ परेका सफललाई काठमाडौं जिल्ला अदालतबाट तीन दिनको म्याद थप गरी अनुसन्धान अघि बढाइएको छ।
