काठमाडौं । बंगलादेशले भारतमा आयोजना हुने टी–२० विश्वकप खेल्न अस्वीकार गरेको छ। राष्ट्रिय टोलीका खेलाडीहरूसँग बैठक बसेपछि बंगलादेशका खेल सल्लाहकार आसिफ नजरुलले भारतमा खेलाडी र सपोर्ट स्टाफको सुरक्षालाई लिएर गम्भीर चिन्ता रहेको बताएका छन्।
“हामी विश्वकप खेल्न चाहन्छौँ, तर भारतमा हाम्रो टोलीको सुरक्षा सुनिश्चित हुने विषयमा अझै आशंका छ,” नजरुलले भने।
यसैबीच, बंगलादेश क्रिकेट बोर्ड (बिसीबी) का अध्यक्ष अमीनुल इस्लाम बुलबुलले अन्तर्राष्ट्रिय क्रिकेट परिषद् (आईसीसी) सँग पुनः छलफल गरिने बताएका छन्। उनले आईसीसीले बंगलादेशका चिन्तालाई गम्भीरतापूर्वक लिनुपर्नेमा जोड दिए।
“आईसीसी बोर्ड बैठकमा केही निर्णय चकित पार्ने खालका थिए। बंगलादेश यो विषयमा आफ्नो लडाइँ जारी राख्नेछ र आईसीसीसँगको संवाद बन्द गर्ने छैन,” बुलबुलले स्पष्ट पारे।
यसअघि, जनवरी २१ मा आईसीसीले भारतमा विश्वकप खेल्ने विषयमा निर्णय गर्न बंगलादेश क्रिकेट बोर्डलाई एक दिनको समय दिएको थियो। तर आईसीसी बोर्ड बैठकले बंगलादेशको भेन्यु परिवर्तनको माग अस्वीकार गरेको थियो।
बंगलादेशले सुरक्षा कारण देखाउँदै आफ्ना खेलहरू भारतको सट्टा श्रीलंकामा आयोजना गर्न आग्रह गरेको थियो। तर आईसीसीले उक्त प्रस्ताव स्वीकार नगरेपछि बंगलादेशले भारतमा खेल्न अस्वीकार गर्ने निर्णय लिएको हो।
स्कटल्यान्डले अवसर पाउन सक्छ
बंगलादेशले भारतमा आयोजना हुने टी–२० विश्वकप खेल्न अस्वीकार गरेपछि स्कटल्यान्डलाई प्रतियोगितामा स्थान पाउने सम्भावना बढेको छ। हालैका मिडिया रिपोर्टअनुसार, वरियताको आधारमा स्कटल्यान्डलाई विश्वकपमा भाग लिन अनुमति दिइन सक्छ। यो प्रक्रिया सन् २००९ मा जिम्बाब्वे हटेको बेला भएको जस्तै हुनेछ।
टी–२० विश्वकप आगामी फेब्रुअरी ७ देखि भारत र श्रीलंकामा खेलिने कार्यक्रम तय छ। बंगलादेशलाई ग्रुप–सीमा राखिएको थियो। ग्रुपका तीनवटा खेल कोलकाता स्थित ईडन गार्डन्स स्टेडियममा खेलिने योजना थियो भने टोलीको अन्तिम ग्रुप चरणको खेल मुम्बईमा आयोजना हुने तय थियो।
यदि स्कटल्यान्डलाई बंगलादेशको स्थानमा अवसर दिइयो भने, उनीहरूले आफ्नो पहिलो अवसरको रूपमा विश्वकपमा भाग लिन सक्नेछन्।
