काठमाडौं। नेपाली कांग्रेसका निवर्तमान प्रचार विभाग प्रमुख मीन विश्वकर्माले हिजो अकस्मात एउटा नयाँ प्रस्ताव गरे फुटेर दुई तिर लागेका कांग्रेसीहरुका लागि ।
उनले आउँदो निर्वाचनका लागि सबै पक्ष मिलेर जानुपर्ने बताएका छन् र यसरी आह्वान गर्ने उनी मात्र नेता भने होइनन् । तर पनि पूर्व सभापति शेरबहादुर देउवा निकटका भएकाले यो प्रस्तावले कांग्रेस मिल्न पनि सक्छ कि भन्ने नयाँ सञ्चार भने गरेको छ ।
आइतबार साँझ सामाजिक सञ्जालमा लेख्दै नेता विश्वकर्माले आउँदो निर्वाचनका लागि दुबै पक्ष मिल्नुपर्ने र यदि त्यसो नहुने हो भने कांग्रेसका लागि अझै दुःखका दिन आउने संकेत पनि गरेका छन् । उनले आधा टिकटमा शेरबहादुर देउवाले हस्ताक्षर गरेको, बाँकी आधामा सभापति गगनकुमार थापाले गर्ने हुँदा त्यसलाई स्वीकारेर जानुपर्ने र अब थप झैझगडातिर लाग्न नहुने बताएका छन् ।
हाल कांग्रेस पार्टी मात्रै होइन, राष्ट्रवादी लोकतान्त्रिक राजननैतिक दलहरू संगै मुलुकको राष्ट्रिय स्वाधीनता र सार्वभौमिकता नै गम्भीर मोडमा रहेकाले यो अवस्थाबाट मुलुकलाई जोगाउने बलियो आधार घोषित निर्वाचन हुन सक्छ भनेर निष्कर्ष निकाल्नुपर्ने र त्यसका लागि कांग्रेस एक हुनुपर्ने उनको तर्क छ ।
त्यसको केही छिनमै कांग्रेसका कार्यबाहक सभापति पूर्णबहादुर खड्काले पनि सोही आसयको वक्तव्य सामाजिक सञ्जालबाट जारी गरेका छन् । उनले कांग्रेस भनेकै रुख र तारा भएकाले त्यसबाहेक अरु कल्पना गर्न पनि नसक्ने बताएका छन् ।
उनले कांग्रेस भनेकै रुख हो तर बजारमा देउवा समूह सर्वाेच्चबाट पनि गगनले मान्यता पाएभने अर्काे चुनाव चिन्ह लिएर चुनावमा जाने तयारी गरेको भन्ने समाचारको खण्डन गर्दै त्यसो भनेका हुन् । उनको आसय पनि कांग्रेस एक भएर जानुपर्ने भन्ने नै थियो । रुख र चारताराका लागि नै विपीदेखि आजसम्मका कांग्रेसका नेता र कार्यकर्ताहरुले लढेकाले अबको कांग्रेस पनि यसैमा रहने भन्दै एकताको संकेत गर्न खोजेका छन् ।
पछिल्लो समय पूर्व सभापति शेरबहादुर देउवाको निकट रहेर काम गरिरहेका पूर्व उर्जामन्त्री दीपक खड्काले पनि सोमबार बिहानै यस्तो आह्वान गरिरहेका छन् । उनले पनि आफ्नो सामाजिक सञ्जालमा लेख्दै आफूले नेपाली कांग्रेस र कांग्रेसको रुखबाहेक अरु केही नजान्ने भन्दै भोलि उम्मेदबारको मनोनयन दर्ताका लागि जिल्लाका सबै नेता तथा कार्यकर्तालाई जिल्ला पार्टी कार्यालयमा जम्मा भएर काम गर्न आग्रह गरेका छन् ।
नेपाली कांग्रेस अहिले दुइटा भएको छ । एक पक्षको नेतृत्व गरेको गगन थापा समूहले भोलि हुने प्रत्यक्षतर्फको उम्मेदबारीका लागि उम्मेदबार छनौट गर्दैछ भने यता देउवा समूह भने पार्टीको आधिकारिताको माग गर्दै सर्वाेच्च अदालत पुगेको छ ।
विशेष महाधिवेशनबाट छानिएको गगन समूहलाई निर्वाचन आयोगले पनि मान्यता दिएपछि देउवा समूह आधिकारिकता माग्दै अदालत गएको हो । आज सरकारी विदा परेकाले सो मुद्धाको पेशी भोलिका लागि तोकिएको छ । जबकि, भोलि नै प्रत्यक्षतर्फको उम्मेदबारी मनोनयन हुदैछ । यता अर्का नेता शेखर कोइराला भने बीचमा बसेका छन् । उनी देउवा र गगन दुवै पक्षको बैठकमा गएका छैनन् । तर उनले गगन समूहमै रहेर काम गर्ने बताएका छन् ।
यसरी तीनतिर फर्किएको कांग्रेसलाई एक ठाउँमा ल्याउने कडी अहिलेसम्म भेटिएको छैन । यदि सर्वाेच्चले पनि निर्वाचन आयोगकै निर्णयलाई सदर गरिदियो भने अर्काे पार्टी खोलेर जाने कि के गर्ने भन्ने अन्योल देउवा समूहमा पनि हुनसक्छ । तर पनि धेरैजसो आफ्नो पक्षका नेताहरु धेरैजसो गगनतिर खुलिसकेकाले केही पुराना नेताबाहेक धेरै कार्यकर्ता त्यतै जाने देखिन्छ ।
त्यसैले यस्तो अवस्थामा हिजो मीन विश्वकर्माले अघि सारेकै प्रस्तावमा अब कांग्रेसीहरु गोलबद्ध हुँदा नै हित देखिन्छ । आगामी वैशाखमा नियमित महाधिवेशन तोकिएकै छ र गगन थापाले पनि गर्छु भनेकै छन् । अहिले पछि पारिएको भनिएका नेताहरुले पनि कसलाई छान्ने हो त्यतिबेला नै पार्टी सभापति चयन गर्दा हुन्छ । अहिलेलाई आसन्न निर्वाचनका लागि लाग्दा नै राम्रो हुनेछ ।
होइन भने यस पटकको निर्वाचन कांग्रेसका लागि भने एक अर्कालाई हराउनेमै लाग्ने देखिन्छ । अरु सबै पार्टीले दलका उम्मेदबार छनोट गरिसकेका छन्, तर कांग्रेस भने अहिले पनि झगडामा रुमल्लिएको छ । जसका कारण कार्यकर्ताहरुमा न जोस छ, नत जाँगर नै । त्यसैले पनि अबको बाटो भनेको मिलेरै जाँदा सहज हुनेछ ।
