काठमाडौँ । राष्ट्रिय स्वतन्त्र पार्टी (रास्वपा)का वरिष्ठ नेता तथा काठमाडौँ महानगरपालिकाका मेयर बालेन शाहले बुझाउन लागेको राजीनामा अन्तिम समयमा होल्ड गरेका छन् । उनी निकटस्थहरूले आजै राजीनामा दिने तयारी रहेको बताए पनि अन्तिम समयमा शाहले निर्णय परिवर्तन गरेका हुन् ।
उम्मेदवारी दर्ता गरेपछि स्वतः पद खारेज हुने कानुनी व्यवस्था रहेकाले पनि उनले राजीनामा तत्काल नदिएको बताइएको छ । बालेन निकट एक नेताका अनुसार अहिलेको राजनीतिक अनिश्चितताका कारण राजीनामा होल्ड गरिएको हो ।
उनले भने ‘राजीनामा नदिई उम्मेदवारी दर्ता गर्ने भनेर अहिल्यै भन्न मिल्दैन । जेहोस्, अन्तिम समयसम्म होल्ड गर्नुहुन्छ । कांग्रेस अदालत गएको छ, त्यतातिर केही निर्णय आउन सक्छ । भोलि चुनाव सर्नेसमेत सम्भावना हुन सक्छ । यही अनिश्चितताले गर्दा अहिले राजीनामा होल्ड गरिएको हो ।”
मेयर शाह केहीबेरमा रास्वपा कार्यालय घण्टीघर जाने कार्यक्रम छ । मेयर पदबाट राजीनामा नदिई उनी पार्टी कार्यालय जान लागेका हुन् ।
झापा–५ बाट प्रतिनिधिसभा सदस्यको निर्वाचन लड्ने तयारी गरेका शाहले उम्मेदवारी दर्ताअघि नै राजीनामा दिने तयारी गरेका थिए । निर्वाचन आयोगले पर्सि (माघ ६ गते) उम्मेदवारी दर्ताको समय तोकेको छ । सोहीअनुसार विभिन्न दलहरू उम्मेदवार टुंगो लगाउने प्रक्रियामा छन् । रास्वपाले पनि आफ्ना उम्मेदवारहरू अन्तिम चरणमा चयन गरिरहेको छ ।
यसैबीच आज दिउँसो २ बजे रास्वपाको केन्द्रीय समिति बैठक पार्टी केन्द्रीय कार्यालय बनस्थलीमा बस्ने तय भएको छ । बैठकअघि पार्टीका वरिष्ठ नेता बालेन शाह पार्टी कार्यालय पुग्ने कार्यक्रम छ । नेताहरूका अनुसार उनी दिउँसो १ बजे पार्टी कार्यालय पुग्नेछन् ।
केन्द्रीय समिति बैठक २ बजेदेखि सुरु हुनेछ । पार्टी सभापति रवि लामिछानेलगायत नेताहरू आजै जनकपुर प्रस्थान गर्ने कार्यक्रम पनि छ । मेयर शाह पनि साँझ ५ बजे जनकपुर जाने कार्यक्रम रहेको जनाइएको छ ।
