काठमाडौँ । नेपाली कांग्रेसको आधिकारिकतासम्बन्धी विवादमा निर्वाचन आयोगको निर्णयविरुद्ध कांग्रेस नेता डा. शेखर कोइराला र उनीनिकट नेताहरू सर्वोच्च अदालत गएका छैनन् ।
देउवा पक्षका निवर्तमान कार्यवाहक सभापति पूर्णबहादुर खड्कासहित विमलेन्द्र निधि, मीनबहादुर विश्वकर्मालगायत नेताहरू निर्वाचन आयोगको निर्णयविरुद्ध रिट लिएर सर्वोच्च पुगेका भए पनि शेखर कोइराला पक्षको उपस्थिति अदालतमा देखिएको छैन ।
निर्वाचन आयोगको निर्णय कार्यान्वयन भए नेपाली कांग्रेसको दुईतिहाइ शक्ति पार्टीविहीन हुने र चुनावमा सहभागी हुनबाटै वञ्चित हुने अवस्था आउन सक्ने दाबी गर्दै देउवा पक्षका नेताहरूले आयोगको निर्णय खारेजीको माग गर्दै रिट दायर गरेका हुन् ।
तर कोइराला पक्षले भने अदालत नजाने निर्णय गर्दै आफ्ना निकट नेताहरूको छुट्टै भेला बोलाएका छन् । डा. कोइरालाले पछिल्लो राजनीतिक परिस्थितिबारे छलफल गर्न आज दिउँसो १ बजे आफ्नो समूहका नेताहरूको बैठक आह्वान गरेका छन् ।
डा. कोइरालाले हिजो बिहान आफूनिकट नेताहरूसँगको छलफलमा आफूहरू विपक्षमा रहेकाले अदालतमार्फत नै न्याय खोज्ने बताएका थिए । तर आज उनीसहित उनका निकट नेताहरू सर्वोच्च अदालतमा उपस्थित नदेखिएपछि कोइराला समूहको रणनीतिबारे प्रश्न उठेको छ ।
यसअघि शुक्रबार देउवा पक्षले सानेपामा बोलाएको बैठकमा पनि डा. कोइराला सहभागी भएका थिएनन् ।
