काठमाडौँ । गगन थापा नेतृत्वको नेपाली काँग्रेसकी उपसभापति पुष्पा भुसालले काँग्रेसमा हाल देखिएको विवाद कुनै विवादको विषयवस्तु नै नभएको टिप्पणी गर्नुभएको छ ।

आधिकारिकता सम्बन्धि जानकारी दिनका लागि शुक्रवार निर्वाचन आयोगमा पुग्नुभएकी उहाँले काँग्रेसमा विवादको भन्दा विधानको विषयवस्तु महत्वपूर्ण भएको बताउनुभएको हो ।

उहाँले विधानको प्रक्रियालाई नै अनुशरण गरेर विशेष महाधिवेशन गरिएको दाबी गर्नुभयो । उहाँले काँग्रेसको विधानले महाधिवेशन प्रतिनिधिलाई शक्तिशाली बनाएको उल्लेख गर्नुहुँदै महाधिवेशन प्रतिनिधिले केन्द्रिय समिति विघटन गर्न पाउने बताउनु भयो । उहाँले आयोगलाई नेपाली काँग्रेसको विशेष महाधिवेशन प्रक्रियाअनुसार भएको छ कि छैन भनेर हेर्न मात्रै आग्रह गर्नुभयो ।

उहाँले भन्नुभयो, ‘अहिले जुन कुराहरु अगाडी आईरहेको छ । हामीलाई लाग्छ, यो कुनै विवादको विषयवस्तू हुँदै होईन । यो विधानको विषयवस्तु हो । विधानको प्रक्रियालाई अनुशरण गरेर नेपाली काँग्रेसले आफ्नो विधिवत् ढंगबाट विशेष अधिवेशन ग¥यो कि गरेन । त्यो प्रश्न चाहीँ अहं  विषयवस्तु हो । हाम्रो विधानले हाम्रो महाधिवेशन प्रतिनिधिलाई सार्वभौम शक्तिशाली संस्थाको रुपमा स्वीकार गरेको छ, हाम्रो विधानले । त्यो विधानभन्दा माथि कोही पनि छैन, नेतृत्व पनि छैन । महाधिवेशनभन्दा माथि न हाम्रो महासमिति छ, नत केन्द्रिय समिति छ, न केन्द्रिय कार्यसम्पादन समिति छ । महाधिवेशन प्रतिनिधिको निर्वाचनबाटै केन्द्रिय कार्य समितिको चयन हुन्छ । महाधिवेशन प्रतिनिधिको प्राकृतिक न्यायको सिद्धान्तअनुसार जसले जन्म दिन्छ, उसले विघटन पनि गर्न पाउँछ । यो सर्वमान्य सिद्धान्त हो, यसलाई सबैले स्वीर्कान पर्छ ।’

उहाँले महाधिवेशन प्रतिनिधि भन्दा माथि नेतृत्व, कार्यसम्पादन समिति, केन्द्रिय कार्यसमिति वा महासमिति कोही पनि नहुने बताउनु भयो ।