काठमाडौँ । नेपाली कांग्रेस विभाजनको अवस्थामा पुगेको छ। पार्टी केन्द्रीय कार्यालय सानेपामा बसेको केन्द्रीय समिति बैठकले तीन पदाधिकारीमाथि कारबाहीको घोषणा गरेसँगै पार्टी औपचारिक रूपमा विभाजनको डिलमा पुगेको हो।
विशेष महाधिवेशन पक्षधरले नयाँ नेतृत्व चयनको अन्तिम तयारी गरिरहेका बेला संस्थापन समूहले महामन्त्रीद्वय गगनकुमार थापा र विश्वप्रकाश शर्मा तथा सहमहामन्त्री फर्मुल्लाह मन्सुरलाई पाँच वर्षसम्म साधारण सदस्यसमेत नरहने गरी कारबाहीको घोषणा गरेको हो।
यस निर्णयसँगै विशेष महाधिवेशन स्थलमा तीव्र आक्रोश देखिएको छ। विशेष महाधिवेशन पक्षधर नेता तथा कार्यकर्ताहरूले सभापति शेरबहादुर देउवाको विरोधमा चर्को नाराबाजी गरिरहेका छन्।
अहिले भृकुटीमण्डप क्षेत्रमा नेता–कार्यकर्ताहरूको चहलपहल उल्लेख्य रूपमा बढेको छ। कांग्रेसको निर्णयअघि भृकुटीमण्डपमा खासै उपस्थिति नदेखिए पनि निर्णय सार्वजनिक भएपछि भने ठूलो संख्यामा नेता–कार्यकर्ता त्यहाँ भेला हुन थालेका छन्।
