काठमाडौँ । भृकुटीमण्डपमा जारी नेपाली कांग्रेसको विशेष महाधिवेशनअन्तर्गत नयाँ नेतृत्व चयनका लागि आज राति मतदान नहुने भएको छ। मतदान प्रक्रिया भोलि बुधबारदेखि मात्र सुरु गरिने केन्द्रीय निर्वाचन समितिले जनाएको छ।
राति मतदान गराउन कठिनाइ हुने भएकाले भोलि बिहानबाट मात्र मतदान प्रक्रिया अघि बढाउने तयारी गरिएको केन्द्रीय निर्वाचन समितिका संयोजक सिताराम केसीले जानकारी दिए।
‘अहिले साढे ७ बजेसम्म मनोनयनपत्र दर्ताको प्रक्रिया चलिरहेको छ। त्यसपछि छलफल गरेर बाँकी प्रक्रिया टुंग्याउँछौँ,’ संयोजक केसीले भने, ‘राति नै मतदान गर्ने सोच छैन। रातभरि मतदान गर्न गाह्रो हुने भएकाले भोलि बिहानबाट सुरु हुन्छ।’
निर्वाचन समितिले यसअघि सार्वजनिक गरेको निर्वाचन कार्यक्रमअनुसार आजै राति ९ बजेदेखि मतदान गर्ने समयतालिका तोकिएको थियो। तर परिस्थितिका कारण उक्त तालिका परिवर्तन गरिएको हो। संयोजक केसीका अनुसार अब नयाँ निर्वाचन तालिका सार्वजनिक गरिनेछ।
विशेष महाधिवेशनमार्फत कांग्रेसको १३४ सदस्यीय केन्द्रीय कार्यसमिति चयन गरिनेछ। निर्वाचन पुरानै विधानअनुसार गराइने निर्वाचन समितिले स्पष्ट पारेको छ।
निर्वाचनबाट १३ पदाधिकारीसहित १२१ केन्द्रीय सदस्य चयन हुनेछन्। जसअनुसार २ उपसभापति, २ महामन्त्री र ८ सहमहामन्त्री निर्वाचित हुनेछन्। खुला केन्द्रीय सदस्यतर्फ ३५ जना चयन हुने निर्वाचन समितिले जनाएको छ।
