काठमाडौं । उच्च अदालत पाटनले अखिल नेपाल फुटबल संघ (एन्फा)को निर्वाचन प्रक्रिया तत्कालका लागि रोक्न आदेश दिएको छ।
उच्च अदालत पाटनका न्यायाधीश कृपासुर कार्कीको एकल इजलासले अन्तरिम आदेश जारी नहुन्जेलसम्म आगामी माघ २८ गते हुने भनिएको अखिल नेपाल फुटबल संघ (एन्फा)को निर्वाचनसम्बन्धी कुनै पनि गतिविधि अगाडि नबढाउन आदेश दिएको हो।
अदालतले अन्तरिम आदेशका विषयमा छलफल गर्न माघ ६ गते पेशी तोकेको छ । सो अवधिसम्मका लागि उम्मेदवारी दर्ता फारम बुझ्ने लगायत निर्वाचनसँग सम्बन्धित कुनै पनि काम नगर्न–नगराउन विपक्षीको नाममा अल्पकालीन अन्तरिम आदेश जारी गरिएको अदालतको आदेशमा उल्लेख छ।
आदेशमा भनिएको छ, “उच्च अदालत नियमावली, २०७३ को नियम ४२ बमोजिम मिति २०८२।१०।६ गते अन्तरिम आदेश छलफलका लागि पेशी तोकी सोको सूचना निवेदक र विपक्षीहरूलाई दिई, सो अवधिसम्मका लागि निर्वाचनसम्बन्धी अन्य कुनै पनि कार्य नगर्नु नगराउनु।”
यसअघि एन्फाले निर्वाचन तालिका सार्वजनिक गरिसकेको थियो । अदालतको आदेशसँगै एन्फाको निर्वाचन प्रक्रिया हालका लागि स्थगित भएको छ।
