काठमाडौं । स्वास्थ्य तथा जनसंख्या मन्त्रालयले सिन्धुपाल्चोकको जुगल गाउँपालिकास्थित गुम्बा गाउँमा केही दिनयता फैलिएको संक्रमण कोरोना भाइरस नभएको बताएको छ ।गाउँपालिकाले कोरोना भाइरसको जस्तै लक्षण देखिएको भन्दै मंगलबार मन्त्रालयलाई पत्राचार गरेको थियो । मन्त्रालयका प्रवक्ता महेन्द्रप्रसाद श्रेष्ठले गुम्बा गाउँमा देखिएको रोग सामान्य रुघाखोकी भएको भन्दै उनले त्यहाँका मानिसलाई कोरोना संक्रमण नभएको दाबी गरे । ‘जुगलको गुम्बा गाउँमा फैलिएको कोरोना होइन, सिजनल फ्लु हो’, उनले भने, उपचारका लागि जिल्ला स्वास्थ्य कार्यालयबाट स्वास्थ्यकर्मीको टोली खटिइसकेको छ । आवश्यक परे काठमाडौंबाट पनि स्वास्थ्यकर्मी पठाउँछौँ ।’
उनले थपे, ‘सिन्धुपाल्चोकमा देखिएको बिरामीमा कोरोना होइन, मौसमी रुघाखोकी हो । गलत सन्देशले भ्रम मात्र फैलियो ।’ वागमती प्रदेशका सामाजिक विकासमन्त्री युवराज दुलालले पनि सिन्धुपाल्चोकमा कोरोना भाइरसको संक्रमण नदेखिएको दाबी गरेका छन् । उनले गुम्बामा देखिएको भाइरल रुघाखोकी र ज्वरोको बारेमा अनुसन्धान र नमुना संकलन गर्न स्वास्थ्यकर्र्मी पुगेको भन्दै धैर्य गर्न आग्रह गरेका छन् । जिल्ला स्वास्थ्य कार्यालयले पनि जुगल गाउँपालिकामा देखिएको समस्या कोरोना नभई मौसमी रुघाखोकी मात्र भएको जनाएको छ ।
त्यहाँ देखिएका बिरामीमा कुनै पनि गम्भीर खालको समस्या नदेखिएको कार्यालयका प्रमुख दुर्गादत्त चापागाईंले जानकारी दिएका थिए । उनले भने, ‘चीनबाट फर्किएको या फर्किएका कोही व्यक्तिसँग कसैको सम्पर्क भएको छ कि भनेर सोधखोज गर्यौ तर त्यस्तो केही पनि भेटिएन । त्यसैले यो कोरोना होइन, मौसमी रुघाखोकी हो ।’ मौसमी रुघाखोकी भएकाले औषधि खाने बिरामी निको हुँदै गएको उनले बताए । मौसमी रुघाखोकी भएकाले औषधि खाने बिरामीहरू निको हुँदै गएका भन्दै उनले गम्भीर खालका बिरामी अहिलेसम्म नदेखिएको बताए ।
कोरोना भाइरस नभए पनि यकिनका लागि अध्ययन गर्न थप टोली त्यहाँ पठाइएको उनले जानकारी दिए । यही २३ माघदेखि गुम्बामा मौसमी रुघाखोकीको समस्या बढ्दै गएको कार्यालयले जनाएको छ । चापागाईंका अनुसार मौसमी रुघाखोकीका कारण त्यहाँ हालसम्म १ सय ५९ जना बिरामी देखिएका छन् । गाउँपालिकाले कोरोना भाइरसँग मिल्दोजुल्दो लक्षण भएका बिरामी भेटिएको भन्दै स्वास्थ्य मन्त्रालयलाई पत्रचार गरेको थियो । गाउँपालिकाको उक्त पत्राचारपछि कोरोना भाइरसको त्रास बढेको हो । सौर्य दैनिकबाट
