काठमाडौं । नेपाल सरकारका प्रवक्ता एवं सञ्चार तथा सूचना मन्त्री गोकुलप्रसाद बाँस्कोटाले आफूले चौधरी ग्रुपसँग २० अर्ब रुपैयाँ नमागेको बताएका छन् । आफुलाई मिडियाले विनोद चौधरीसँग सिजी कम्युनिकेसनको लाइसेन्स दिने प्रक्रियामा २० अर्ब घुस मागेको भनी समाचार आएकोमा आपत्ति जनाए । उनले सरकारले चौधरी ग्रुपलाई प्रक्रिया पुराएर आउन आग्रह मात्र गरेको बताए ।
मन्त्री बाँस्कोटाले सिजी कम्युनिकेसनले प्रक्रिया नपुराएकोले लिमिटेड मोविलिटी सेवाको लाइसेन्स खारेज गरेको बताए । त्यस कामका लागि आफूले २० अर्ब घुस नमागेको भन्दै त्यत्रो पैसा राख्न आफ्नो घरमा ठाउँ पनि नरहेको स्पष्ट गरे ।
बिहीबार मन्त्रिपरिषदका निर्णय सार्वजनिक गर्ने नियमित पत्रकार सम्मेलनमा बाँस्कोटाले सिजीसँग पैसा मागेको भन्ने आरोप झूटो समेत भएको दाबी गरे ।
उनले भने ‘चौधरी ग्रुपपसँग २० अर्ब माग्यो भन्छन्, मलाई त्यत्रो पैसा चाहिँदैन । मेरो घरमा त्यति पैसा राख्ने ठाउँ छैन! ।
