कर्णाली। कर्णाली प्रदेशका मुख्यमन्त्री मङ्गलबहादुर शाहीले तीन तहका सरकारबीचको आपसी समन्वय र सहकार्यबाट मात्र सङ्घीयता सफल हुने बताउनुभएको छ ।
मुख्यमन्त्री तथा मन्त्रिपरिषद् कार्यालय, प्रदेश तथा स्थानीय शासन सवलीकरण, प्रदेश कार्यक्रम सहयोग एकाइद्वारा आज मुगुको सदरमुकाम गमगढीमा आयोजित अन्तरक्रियामा मुख्यमन्त्री शाहीले सङ्घीय व्यवस्था कार्यान्वयनका लागि सङ्घ, प्रदेश र स्थानीय तहबीच आवश्यक समन्वय र सहकार्य आवश्यक रहेको बताउनुभयो । उहाँका अनुसार विकास निर्माणका काममा तीन तहबीच पर्याप्त समन्वय र सहकार्य गरेमा प्रभावकारी नजिता प्राप्त हुन्छ ।
“विकास निर्माण, सेवा प्रवाह तथा शासन सञ्चालनमा प्रभावकारी समन्वय, सहकार्य र सहजीकरणको खाँचो पर्दछ । यसमा तहका संयन्त्र भिन्नभिन्न तरिकाले काम गर्दा उल्टै समस्या हुनसक्छ”, मुख्यमन्त्री शाहीले भन्नुभयो, “हामी जति आपसमा समन्वय, सहकार्य र सहअस्तित्वको भावनाका साथ अघि बढ्छौँ, त्यति जनतालाई राहत र सुविधा पाउने अवस्था सिर्जना हुन्छ ।”
उहाँले प्रदेश सरकारका नीति तथा कार्यक्रम प्रभावकारी रूपमा कार्यान्वयन गर्न स्थानीय तह र सङ्घीय सरकारका जिल्लास्थित कार्यालयको समेत महत्त्वपूर्ण भूमिका रहने धारणा राख्नुभयो ।
प्रदेश सरकारले स्थानीय तह र सङ्घीय निकायसँग गर्नुपर्ने समन्वयमा कुनै कमी हुन नदिने भन्दै उहाँले सहकार्य गरेरै अघि बढ्ने प्रतिबद्धता जनाउनुभयो ।
कार्यक्रममा कर्णाली प्रदेश सरकारका प्रमुख सचिव राधिका अर्यालले विकास निर्माण साझा सवाल भएकाले कार्यान्वयनका क्रममा देखापरेका समस्यालाई समाधान गर्न सबैको सहयोग त्यत्तिकै जरुरी रहेको बताउनुभयो । उहाँका अनुसार सबै सरकारको एउटै उद्देश्य भनेको नागरिकका माग, आवश्यकता र समस्यालाई सम्बोधन गरी उनीहरुलाई सुशासन र सेवा प्राप्तिको अनुभूति गराउनु हो ।
उक्त अन्तरक्रियामा जिल्लास्थित प्रदेशका कार्यालय प्रमुखहरूले स्थानीय तह, सङ्घीय कार्यालयबीच विगतमा समन्वय र सहकार्यमा देखिएका समस्याबारे अवगत गराउनुभएको थियो ।
कार्यक्रममा सङ्घ, प्रदेश सरकारका जिल्लास्थित कार्यालय प्रमुख, स्थानीय तहका प्रमुख तथा प्रतिनिधिहरुको सहभागिता थियो । रासस
