पोखरा । राष्ट्रिय स्वतन्त्र पार्टी (रास्वपा) सभापति रवि लामिछानेले रास्वपा कुनै पनि हालतमा विधिभन्दा बाहिर नजाने दाबी गरेका छन्।
बुधबार पोखरामा सञ्चारकर्मीहरूसँग कुरा गर्दै उनले पार्टी परिवारवादविरुद्ध स्पष्ट रहेको र विधानले नै त्यस्तो व्यवस्था नदिने बताए।
समानुपातिक बन्दसूचीमा परेका केही व्यक्तिबारे उठेको आलोचनाको जवाफ दिँदै लामिछानेले समय अभावका कारण तयारीमा कमी हुनसक्ने स्वीकार गरे। उनले जायज गुनासोहरू दुई दिनभित्रै रिभ्यू गरेर सम्बोधन गरिने स्पष्ट पारे।
पछिल्ला राजनीतिक घटनाक्रमका कारण समाजका सबै तहका सचेत नागरिक राजनीतिमा सक्रिय हुन खोजिरहेको उनको भनाई छ। “राजनीति दुषित हुँदा राजनीतिबाट टाढा रहेका मानिसहरू पनि जुर्मुराएका छन्,” उनले भने।
पोखराको सूर्यदर्शन सहकारी ठगी प्रकरणमा तारिख बुझ्न उनी पोखरा आएका हुन् । जिल्ला अदालत कास्कीमा तारिखका लागि उपस्थित हुन पोखरा आएका रवि सूर्यदर्शन सहकारी ठगी प्रकरणमा धरौटीमा रिहा भएका थिए। जिल्ला अदालत कास्कीले ६५ लाख रुपैयाँ धरौटीमा उनलाई रिहा गर्न आदेश दिएको थियो।
