काठमाडौं । जेनजी आन्दोलन जाँचबुझ आयोगले तत्कालीन गृहमन्त्री रमेश लेखकको बयान लिएको छ । पूर्वघोषणासहित सोमबार आयोग कार्यालय पुगेर लिखित बयान दिएका लेखकले ‘आन्दोलन दमनमा आफ्नो कुनै निर्देशन नभएको’ दाबी गरेका छन् ।
‘२४ भदौ आन्दोलन होइन, घुसपैठ’
तत्कालीन गृहमन्त्री लेखकले ‘गत २३ भदौको प्रदर्शन र त्यसमा भएको दमनको नैतिक जिम्मेवारी लिएर आफूले राजीनामा दिएको’ बताउँदै ‘२४ भदौमा घुसपैठ भएको’ दाबीसमेत गरेका हुन् । आयोगले सरकारको नेतृत्वकर्ताको हिसाबले तत्कालीन प्रधानमन्त्री केपी शर्मा ओलीसँग पनि लिने जानकारी दिइसकेको छ आयोगले ‘ओलीले परिस्थिति सहज बनाइदिने विश्वास लिएको’ जनाएको छ ।
तत्कालीन गृहमन्त्री लेखकसँगको बयान सकिएपछि ओलीको लिइने आयोगको भनाइ छ । छानबिन आयोगले लेखक र ओलीबाट ‘न्यूनत्तम बयान’ अपेक्षा गरेको संकेत गरेको छ । आयोग स्रोतले बयानअघि स्थानहद नखुल्ने बतायो ।
स्रोतले आयोग प्रवक्ता विज्ञानराज शर्मालाई उद्धृत गर्दै जनाएअनुसार ‘तत्कालीन प्रधानमन्त्री ओलीको पनि न्यूनत्तम बयान लिएपछि स्थानहद फुकुवा गरी राजनीतिक गतिविधिका लागि सहज वातावरण बनाइने’ छ । तत्कालीन गृहमन्त्री लेखकसँग सोमबारको बयान ‘औपचारिक सोधपुछ’मात्रै भएको बताउँदै प्रवक्ता शर्माले भने, ‘आयोगले आवश्यकताअनुसारका छलफल र बयान लिनेछ, अरुका बयानमा जोडिएका विषयमा समेत गृहमन्त्रीको हैसियतमा उहाँसँग सोधपुछ गर्नुपर्ने हुन्छ ।’
ओलीका हकमा आयोग लचक
तत्कालीन प्रधानमन्त्री ओलीको हकमा ‘ बयानको औपचारिकता कसरी पूरा गर्ने अन्तरिम सरकार प्रधानमन्त्री सुशीला कार्कीसँगको भेटपछि बयान र स्थानहद विषयमा ओलीका हकमा लचिलो वातावरण बनाइने सरकारको धारणा रहँदै आएको छ । ‘बयान नलिइए जेनजी आन्दोलनका सरोकारवालाको दबाब झेल्नै नसकिने र विवाद बढ्ने सम्भावना बढिरहेको’ सरकारको बुझाइ छ भने अर्कातर्फ ओलीले ‘बयान नदिने, बरु गोली ठोके हुन्छ’ भन्दै सरकारलाई चेतावनी दिइरहेका छन् ।
आयोगलाई गुण्डुको निम्तो
जेनजी आन्दोलन विषयमा सोधपुछ भन्दै छानबिन आयोगले भक्तपुर गुण्डु नै पुगेर ओलीसँग भेटवार्ता गर्नसक्ने सम्भावना बढ्दै गएको बुझिएको छ । ‘आमरूपमा ओलीसँग बयान लिइएको’ भन्दै आयोगले ‘फेस सेभिङ गर्ने र त्यसलगत्तै बयानपछि स्थानहद फुकुवा गरिएको’ भन्दै आयोग वक्तव्य केही दिनमै आउने सम्भावना रहेको बुझिएको छ ।
तत्कालीन प्रधानमन्त्री तथा एमाले अध्यक्ष ओलीले पनि ‘आफू आयोगमा बयान दिन नजाने’ चेतावनी दिँदै ‘आफूकहाँ आएको खण्डमा चिया पिलाएर स्वागत गर्ने’ भन्दै आयोगसँगको भेटवार्ता संकेत गरिसकेका छन् । ओलीले भिन्न शैलीमा आयोगसँगको भेटवार्तालाई ‘बयान’ भन्दै ‘फेससेभिङ गर्ने सम्भावना एक एमाले पदाधिकारीले समेत स्वीकारे ।
ती पदाधिकारीले भने, ‘सरकारले निर्वाचन गराउने नै भन्ने हो भने वातावरण सहज बनाउनैपर्यो, त्यसका लागि मध्यमार्गी बाटो अपनाउन सकिन्छ, जुन आयोगले पनि सोचेकै होला ।’ राजधानी दैनिकबाट
