भक्तपुर : आइतबार साँझ नौ बज्दै थियो, चाँगुनारायण नगरपालिका–७ तपादम्फो (हेल्मेड डाँडा)को खुल्ला क्षेत्रमा चिसो उत्तिकै बढेको थियो । चिसोको पर्वाह नगरी हजारौँ दर्शक गायक स्वर्गीय बुद्धिकृष्ण लामिछाने साँझ–२०८२ को रौनकतामा झुमिरहे ।
भारतीय चर्चित गायक आर्काे मुखर्जीले ‘पिँढीमा बसेर मेरै बाटो हेरेर मेरी आमा रुँदी हुन्, मलाई सम्झेर’ बोलको गीतलाई रिमिक्समा गाउँदा हजारौँ दर्शकहरु नाचेका थिए ।
चाँगुनारायण नगरपालिकाले आज सो कार्यक्रम आयोजना गरेको थियो । चाँगुनारायण नगरपालिका–७ मा २०१५ साल साउन १ गते जन्मेका लामिछानेको २०७५ साल पुस १३ गते निधन भएको थियो । चर्चित लोक गायक लामिछानेको आठौँ स्मृति दिवसका अवसरमा उहाँको योगदानको स्मरण गर्दै नगरपालिकाले स्वर्गीय बुद्धिकृष्ण लामिछाने साँझ–२०८२ आयोजना गरेको हो ।
कार्यक्रममा स्व लामिछानेको चर्चित गीतहरु पिँढीमा बसेर, घाँस काट्ने खुर्केर आयो जोवन हुर्केर, गाई त बाँध्ने पाटको दाम्लो’लगायतका दर्जनौँ गीत विभिन्न कलाकारहरुले प्रस्तुत गरेका थिए ।
भारतीय चर्चित गायक आर्काे मुखर्जीको विशेष प्रस्तुतीले दर्शकलाई तानेको थियो । कार्यक्रममा ऐक्या हामी व्याण्ड, कोमल ओली, बिक्रम सुवाल, दोहारी गायक सानु केसी, सविता ढुङ्गाना, कपिस कसपाल, सूर्यमणी आचार्य, सविना केसीलगायतका दर्जनौँ गायक गायिकाले स्व लामिछानेका र आफ्ना गीत गाए ।
वागमती प्रदेशका मुख्यमन्त्री इन्द्र बानियाँले कार्यक्रमको उद्घाटन गर्दै कलाकार देशको गहना भएकाले उनीहरुको सम्मानलाई प्रथामिकतामा राख्नुपर्ने बताउनुभयो ।
चाँगुनारायण नगरपालिकाका प्रमुख जीवन खत्रीले नगरकोट भ्रमण वर्षको अवसर पारेर आफ्नै ठाउँका गायक बुद्धि कृष्ण लामिछानेको सम्झनामा आयोजित कार्यक्रमले उहाँको योगदानलाई जिवन्त राख्न टेवा पुग्ने बताउनुभयो ।
कार्यक्रममा स्व गायक लामिछानेको जीवनी समेटेर प्रकाशित पुस्तकको समेत बिमोचन गरिएको थियो ।
त्यसैगरी नगरपालिकाले स्व लामिछानेलाई मरणोपरान्त रु ५१ हजार नगद पुरस्कारसहित सम्मान गरेको छ । लामिछानेकी श्रीमती दुर्गादेवी लामिछानेलाई मुख्यमन्त्री बानियाँ र नगर प्रमुख खत्रीले दोसल्ला ओढाएर सम्मान पत्रका साथ ५१ हजारको चेक हस्तान्तरण गर्नुभयो । ३० हजारभन्दा बढी दर्शकको उपस्थिति रहेको साँस्कृतिक साँझमा स्थानीय उत्पादन, खानाका परिकारका स्टल राखिएका थिए । रासस
