काठमाडाैँ । स्याङ्जाकाे वालिङ नगरपालिका क्षेत्रबाट प्रहरीले करिब ९० लिटर अवैध घरेलु मदिरा बरामद गरी नष्ट गरेको छ।
वडा प्रहरी कार्यालय वालिङबाट खटिएको प्रहरी टोलीले सोमबार वालिङ नगरपालिका–८, ९ र १० का विभिन्न होटलमा चेकजाँच गर्ने क्रममा बिक्री–वितरणका लागि लुकाइछिपाइ राखिएको अवस्थामा करिब ९० लिटर घरेलु मदिरा बरामद गरेको हो।
बरामद गरिएको घरेलु मदिरा वडा प्रहरी कार्यालय वालिङको परिसरमा स्थानीय जनप्रतिनिधि, भद्रभलाद्मी तथा बुद्धिजीवीहरूको रोहवरमा नष्ट गरिएको प्रहरीले जनाएको छ।
प्रहरीले अवैध रूपमा उत्पादन तथा बिक्री–वितरण हुने घरेलु मदिराका कारण हुन सक्ने आपराधिक तथा सामाजिक गतिविधि नियन्त्रणका लागि होटल तथा अन्य व्यवसायिक क्षेत्रमा नियमित चेकजाँच गर्दै आएको जनाएको छ।
