काठमाडौं । ललितपुरमा बोरामा प्याक गरिएको अवस्थामा शव भेटिएको घटनाको अनुसन्धानका क्रममा अर्का एक व्यक्तिको पनि हत्या भएको खुलेको छ।
प्रहरीका अनुसार हत्या हुनेमा भोजपुरका २१ वर्षीय पारुहाङ राई छन्। उनको शव आज भक्तपुर र ललितपुरको सिमानामा पर्ने सूर्यविनायक नगरपालिका–७ को जंगलमा फेला परेको हो।
यसअघि २ पुसमा ललितपुरको महालक्ष्मी नगरपालिका–८ स्थित शेरफाँटमा रहेको एक इनारमा सिन्धुलीको गोलन्जोर गाउँपालिका–३ घर भएका केशवराज हायुको शव बोरामा प्याक गरिएको अवस्थामा भेटिएको थियो।
सो घटनाको अनुसन्धानका क्रममा प्रहरीले सुरुमा देवराज ढुंगेललाई पक्राउ गरेको थियो। उनीसँगको सोधपुछका क्रममा जयराज अधिकारीको नाम खुलेपछि प्रहरीले आज बिहान सिन्धुलीबाट जयराजलाई पनि पक्राउ गरेको हो।
प्रहरीका अनुसार जयराज अधिकारीले पारुहाङ राईको पनि हत्या गरेको स्वीकार गरेका छन्। उनले बताएअनुसारकै स्थानबाट प्रहरीले पारुहाङ राईको शव फेला पारेको जनाएको छ।
देवराज ढुंगेल र जयराज अधिकारीले गत मंसिर २४ गते केशवराज हायुको हत्या गरेको र त्यसको भोलिपल्ट मंसिर २५ गते पारुहाङ राईको पनि हत्या गरेको स्वीकार गरेको प्रहरीको भनाइ छ।
अपराध अनुसन्धान कार्यालयका एसएसपी रमेश बस्नेतले दुवै अभियुक्तले दुई जनाको हत्या गरेको स्वीकार गरेको जानकारी दिए। घटनासम्बन्धी थप अनुसन्धान जारी रहेको प्रहरीले जनाएको छ।
