काठमाडौं । चीनको वुहानबाट उद्वार गरिएका मानिस सवार बसमा आक्रमण भएको छ । युक्रेनको मध्य–क्षेत्रमा रहेको सहर नोभी स्यान्झारीका स्थानीयले बसमा आक्रमण गरेका हुन् ।
वुहानबाट फिर्ता गरिएका मानिसहरुमा कोरोना भाइरस छ भन्ने हल्ला फैलिएपछि आक्रमण भएको बताइएको छ । बसमा ४५ युक्रेनी र २७ विदेशी सवार थिए भने उनीहरुको लागि नोभी स्यान्झारी सहरमा क्वारेन्टाइन बनाइएको थियो ।
स्थानीयले सडकमा टायर बालेर विरोधसमेत गरेका छन् । सहर पस्ने पुलमा समेत बस छिर्न नदिन अवरोध पुर्याएका थिए । उनीहरुले बसमा ढुङ्गामुडा गरेर बसका सिसाहरु समेत फुटाएका छन् । बसको सुरक्षाको लागि सयौँ प्रहरी खटिएका थिए ।
राष्ट्रपति भोलोदीमीर जेलेन्स्कीले प्रदर्शनकारीलाई मानिसको रुपमा अर्को मानिसप्रति करुणा प्रदर्शन गर्न आह्वान गरेका थिए ।
