काठमाडौँ । नेकपा एमालेका उपमहासचिव प्रदीप ज्ञवालीले पार्टी अध्यक्ष केपी शर्मा ओलीको प्यानलबाट उपाध्यक्ष पदमा उम्मेदवारी दिन अस्वीकार गरेका छन्।
पार्टी स्रोतका अनुसार ज्ञवालीले उपाध्यक्ष पदमा उम्मेदवारी नदिई केन्द्रीय सदस्य पदमा मात्र उम्मेदवारी दर्ता गराएका छन्।
स्रोतले भन्यो, “उहाँले उपाध्यक्ष पद अस्वीकार गर्नुभएको हो। केन्द्रीय सदस्यमा मात्र उम्मेदवारी दर्ता गरेर बाहिरिनुभएको छ।”
ज्ञवाली अध्यक्ष ओलीको प्यानलबाट महासचिव पदका आकांक्षी थिए। तर सो पदमा निरन्तरता पाउने भएपछि शंकर पोखरेल नै महासचिवमा दोहोरिएका छन्। महासचिव पद नपाएपछि ज्ञवाली असन्तुष्ट बनेको नेताहरूको भनाइ छ।
महासचिव बाहेक अन्य कुनै पदमा नउठ्ने अडान लिएका ज्ञवालीलाई मनाउन अध्यक्ष ओलीले शुक्रबार बिहान आफ्नै निवास गुन्डुमा प्रयास गरेका थिए। तर ज्ञवालीले आफ्नो अडान नछाडेपछि उपाध्यक्ष पदमा उम्मेदवारी नदिएको स्रोतले जनाएको छ।
ज्ञवाली दिउँसो महाधिवेशनस्थल पुगे पनि सञ्चारकर्मीसँग कुनै प्रतिक्रिया नदिई बन्दसत्र हलमा प्रवेश गरेका थिए।
