काठमाडौं । नेकपा एमालेले केन्द्रीय कमिटीमा सबै क्लस्टरबाट ४० वर्षमुनिका युवाको कोटा सुनिश्चित गर्ने प्रस्ताव अघि सारेको छ ।
भृकुटीमण्डपमा जारी महाधिवेशनको बन्दसत्रमा महासचिव शंकर पोखरेलले उक्त प्रस्ताव पेश गरेका हुन् । प्रस्तावअनुसार पार्टीको केन्द्रीय संरचनामा युवाको सहभागिता बढाउने उद्देश्यले प्रत्येक प्रदेश कमिटीमा ४० वर्षमुनिका युवालाई अनिवार्य रूपमा समेटिनेछ ।
महासचिव पोखरेलका अनुसार कोशी प्रदेश कमिटीमा ४० वर्षमुनिको १ युवा, खुलातर्फ ६ र महिलातर्फ १ जना रहने व्यवस्था प्रस्ताव गरिएको छ । मधेश प्रदेशमा पनि सोहीअनुसार ४० वर्षमुनिको १ युवा, खुला ६ र महिला १ जना रहनेछन् ।
बागमती प्रदेशमा ४० वर्षमुनिको १ युवा, खुला ६ र महिला ३ जना रहने प्रस्ताव गरिएको छ । गण्डकी प्रदेशमा पनि यही संरचना लागू हुने जनाइएको छ ।
यस्तै कर्णाली प्रदेश कमिटीमा ४० वर्षमुनिको १ युवा सहित खुला ६ र महिला ३ जना रहने व्यवस्था प्रस्ताव गरिएको छ । राजधानी प्रदेश कमिटीमा पनि ४० वर्षमुनिको १ युवा, खुला ६ र महिला ३ जना रहने प्रस्ताव पेश गरिएको छ ।
पार्टी नेतृत्वले यस प्रस्तावमार्फत संगठनमा युवाको भूमिका बलियो बनाउने र नेतृत्व हस्तान्तरणलाई संस्थागत गर्ने लक्ष्य लिएको जनाएको छ । प्रस्तावमाथि बन्दसत्रमा छलफल भइरहेको छ ।
