काठमाडौँ । प्रभु बैंक लिमिटेडका रेमिट्यान्स विभाग प्रमुख सुगेन (सुजिन) शाक्य पक्राउ परेका छन्।
बुधबार केन्द्रीय अनुसन्धान ब्यूरो (सीआईबी)ले उच्च अदालत पाटनबाट पक्राउ अनुमति लिएपछि ४२ वर्षीय शाक्यलाई ललितपुर महानगरपालिका–१७ स्थित ईखाँछे क्षेत्रबाट नियन्त्रणमा लिएको हो।
सीआईबीका अनुसार शाक्यमाथि रेमिट कारोबार सञ्चालनका क्रममा प्रभु बैंकलाई हानि पुर्याई आफ्नो स्वार्थ समूह अन्तर्गतको प्रभु मनि ट्रान्सफरलाई फाइदा हुनेगरी गैरकानुनी रुपमा गतिविधि सञ्चालन गरेको आरोप छ।
सीआईबीको प्रारम्भिक अनुसन्धानमा शाक्यले बैंकलाई १ अर्ब रुपैयाँभन्दा बढी नोक्सानी हुनेगरी ‘प्रिफन्डिङ’ सम्बन्धी कानूनी व्यवस्थाको दुरुपयोग गरेको देखिएको छ। बैंकमार्फत रेमिट ट्रान्सफर गर्दा हुने फाइदाका नाममा प्रिफन्डिङ सुविधा दुरुपयोग गरी रकम आफ्नै निहित समूहमा प्रवाह गरिएको आरोप प्रहरीले जनाएको छ।
त्यसैगरी, प्रभु म्यानेजमेन्ट प्रालिलाई नियम विपरीत सुपर एजेन्ट घोषणा गर्दै अग्रिम रकम उपलब्ध गराएको र रेमिट सेवा स्थगित भइसकेपछि पनि लामो समयसम्म उक्त रकम स्वार्थ समूहले प्रयोग गर्न दिएको आरोप शाक्यमाथि छ। नेपाल राष्ट्र बैंकको निर्देशनविपरीत गैरकानुनी गतिविधि गरी बैंकलाई ८ करोड ९३ लाख १९ हजार ९९८६ रुपैयाँ नोक्सानी पुर्याएको सीआईबीले बताएको छ।
यसअघि सोही प्रकरणमा प्रभु बैंकका सीईओ अशोक शेरचन, नायव सीईओ मणिराम पोखरेल तथा प्रमुख कर्ता अधिकृत रिवास श्रेष्ठलाई पनि पक्राउ गरिएको थियो। उनीहरूविरुद्ध बैंकिङ कसूरसम्बन्धी मुद्दामा अनुसन्धान जारी छ।
