काठमाडौँ । नवलपुरका प्रहरी नायव उपरीक्षक (डीएसपी) मधु नेपाल बहुविवाह आरोपमा पक्राउ परेका छन्। नेपाललाई उनकी जेठी श्रीमती तारा खनाल नेपालको उजुरीका आधारमा जिल्ला प्रहरी कार्यालय रुपन्देहीले पक्राउ गरेको हो।
प्रहरीले अदालतबाट पक्राउ पुर्जी लिएर सोमबार उनलाई नियन्त्रणमा लिएको जनाएको छ। जिल्ला प्रहरी कार्यालय रुपन्देहीका प्रमुख एसपी प्रदीपबहादुर क्षेत्रीका अनुसार पक्राउ पुर्जी जारी भएको जानकारी पाएपछि डीएसपी नेपाल स्वयं प्रहरी कार्यालयमा उपस्थित भएका थिए। उनलाई नियन्त्रणमा लिएर आवश्यक अनुसन्धान अघि बढाइएको छ।
उनीमाथि प्रहरीले ३ दिनको म्याद थप गरी अनुसन्धान जारी राखेको जनाएको छ। स्रोतका अनुसार डीएसपी नेपालले प्रहरी संगठनमै कार्यरत एक असईसँग दोस्रो विवाह गरेको आरोप छ।
यसअघि पनि नेपाल २०७४ सालमा बुटवलस्थित वडा प्रहरी कार्यालय रामनगरमा प्रहरी निरीक्षकका रूपमा कार्यरत रहेका बेला गाँजा कारोबार–सम्बन्धी आर्थिक लेनदेन विवादमा मुछिँदा निलम्बनमा परेका थिए। उक्त घटनापछि उनी प्रहरी नायव उपरीक्षकको तत्कालीन बढुवा सूचीमा समेत छुटेका थिए।
