काठमाडौँ । नेपाली कांग्रेसका सभापति शेरबहादुर देउवाले पार्टीभित्र पछिल्लो समयमा देखिएको महाधिवेशनको विवाद समाधान गर्ने प्रयासस्वरुप पार्टीको इतर पक्षका नेता डा शेखर कोइरालासहित पदाधिकारी तथा पूर्वपदाधिकारीको बैठक आह्वान गरेका छन् ।
उनले आज आइतबार दिउँसो १ बजे आफ्नै निवास महाराजगन्जमा सो बैठक आह्वान गरेका हुन् । सो बैठकमा पदाधिकारी नरहेका इतर समूहका नेता डा। शेखर कोइरालालाई पनि बोलाइएको समाचार स्रोतले बतायो । त्यसैगरी सो बैठकमा पदाधिकारी र पूर्वपदाधिकारी नरहेका अरु वरिष्ठ नेताहरूलाई पनि बोलाइएको छ ।
सभापति देउवा जेनजी आन्दोलनमा आक्रमणमा परेपछि गएको असोज २८ गते उपसभापति पूर्णबहादुर खड्कालाई कार्यवाहक सभापतिको जिम्मेवारी दिएका थिए । त्यसपछि पार्टीका औपचाकि बैठकहरुमा सहभागी नभएका उनी पार्टीभित्र महाधिवेशनका बारेमा बढ्दो रहेको विवाद मिलाउन भने सक्रिय छन् । उनले विवाद झन् गहिरिँदै गएपछि पुनः सक्रियता देखाएका हुन् ।
सभापति देउवाले गएको बिहीबारदेखि विभिन्न नेताहरूसँग छुट्टाछुट्टैतथा सामूहिक रुपमा छलफल गरिरहेका छन् । आजको बैठकमा भने दुवै पक्षका नेताहरूलाई उनले बोलाएका हुन् । कांग्रेसमा संस्थापन पक्षका नेताले पार्टीको १५ औँ महाधिवेशन फागुन २१ मा तोकिएको प्रतिनिधिसभा निर्वाचनपछि मात्रै महाधिवेशन गर्नेमा अड्डी कसेपछि विवाद कम हुन सकेको छैन ।
उता महामन्त्री गगन थापा निर्वाचन अगावै विशेष महाधिवेशन गर्नुपर्ने पक्षमा छन् भने इतर पक्षका नेता डा कोइराला चुनाव अगावै महाधिवेशन गर्नुपर्ने तर विशेष नभएर नियमित भन्नेमा छन् ।
यसैबीच सभापति देउवा आगामी पुसको अन्तिम सम्ममा महधिवेशन गर्नुपर्नेमा सहमत भए पनि निर्वाचन अगाडि महाधिवेशन गर्नै हुन्न भन्ने पक्षमा पूर्वउपसभापति विमलेन्द्र निधि र पूर्वमहामन्त्री कृष्णप्रसाद सिटौला छन् ।
यसकारण नेपाली कांग्रेसमा सहमति हुन सकिरहेको छैन । लामो समयसम्म यही विवाद कायम रहँदा पार्टी फुटको संघारमा पुगेको समेत बताउन थालिएकोछ ।
