काठमाडौँ । कुलमान घिसिङ संरक्षक रहेको उज्यालो नेपाल पार्टी आगामी मंसिर १७ गते औपचारिक रूपमा सार्वजनिक हुने भएको छ।
शुक्रबार काठमाडौँमा आयोजित पत्रकार सम्मेलनमार्फत पार्टीले सो दिन दिउँसो १ बजेदेखि ४ बजेसम्म कमलादीस्थित प्रज्ञा भवनमा भव्य घोषणासभा आयोजना गरिने जानकारी दिएको छ।
घोषणासभाका प्रमुख अतिथि ऊर्जामन्त्री कुलमान घिसिङ रहने छन्। कार्यक्रममार्फत पार्टीको दीर्घकालीन दृष्टि, मूल ध्येय तथा विस्तृत घोषणापत्र–२०७९र८२ सार्वजनिक गरिने पार्टीले जनाएको छ।
पत्रकार सम्मेलनमा वितरित विज्ञप्तिअनुसार उज्यालो नेपाल पार्टीले समान दृष्टिकोण भएका नयाँ तथा वैकल्पिक राजनीतिक दल, संघ–संस्था, सरोकारवाला समूह र व्यक्तिहरूसँग सहकार्य गर्दै अघि बढ्ने प्रतिबद्धता व्यक्त गरेको छ।
‘हामी दलहरूको भीडमा थप एक नयाँ दलको रूपमा मात्रै आएका होइनौँ,’ विज्ञप्तिमा भनिएको छ, ‘हामीसँग उज्यालो सपनालाई साकार पार्न सक्ने नेतृत्व, कार्यकुशलता र अनुभव छ। आम नेपाली जनताले विश्वास गरेको, कामबाट प्रमाणित नेतृत्व हाम्रो सबैभन्दा ठूलो पूँजी हो।’
पार्टीले आफू नयाँ राजनीतिक विकल्पका रूपमा उदाउँदै देशको रूपान्तरणका लागि प्रभावकारी भूमिका खेल्ने दाबी गरेको छ।
