काठमाडौँ । भौतिक पूर्वाधार तथा यातायातमन्त्री कुलमान घिसिङ र युवा तथा खेलकुदमन्त्री बब्लु गुप्ताले जनकपुरधामस्थित निर्माणाधिन रामजानकी रंगशालाको निरिक्षण गर्नुभएको छ ।
शुक्रवार बिहानै मन्त्रीद्वय घिसिङ र गुप्ताले रंगशाला पुगेर निरिक्षण गर्नुभएको हो । उहाँहरुले रंगशाला निर्माणको कार्य रोकिनुको कारण, खेल मैदानको अवस्था लगायतका विषयमा जानकारी लिनुभएको छ । यसका साथै मन्त्रीहरु घिसिङ र गुप्ताले भासिएको कमला पुलको समेत निरिक्षण गर्न लाग्नुभएको हो । मन्त्री घिसिङले भासिएको कमला पुलको विषयमा छिट्टै नै निर्णय लिने जानकारी दिनुभयो । उहाँले कमला पुलको विषयमा सञ्चारकर्मीको प्रश्नमा उहाँले आफूले परिस्थिति बुझेर निर्णय गर्ने बताउनु भयो । कमला पुल बन्नुपर्ने पक्षमा आफूहरु रहेको बताउनु भयो ।
उहाँले भन्नुभयो, ‘त्यहाँको वास्तविकता बुझेर हामी थप काम अघि बढाउँछौँ । हामी के गर्ने भन्नेकुरा डिसिजन गर्छौं । तत्काल बनाएर अघि बढ्ने वा त्यसको सबैकुरा सबै पक्ष हेर्नुपर्छ । अघि बढ्छौँ । कुनैपनि हालतमा त्यो पुल बन्नुपर्छ ।’
रंगशाला निरिक्षणको क्रममा मधेसको खेलकुद मन्त्रालयका सचिव रञ्जित यादव, जिल्ला क्रिकेट संघका पदाधिकारी, खेलाडीहरुले त्यहाँको वस्तुस्थितिको विषयमा जानकारी गराउनुभएको थियो ।
