काठमाडौं । अशोक राई नेतृत्वको जनता समाजवादी पार्टी (जसपा)भित्र पार्टी एकतालाई लिएर स्पष्ट मतभेद सार्वजनिक हुँदै गएको छ।
नेकपा (एकीकृत समाजवादी) सँग एकता गर्ने कि मधेस केन्द्रित दलहरूसँग सहकार्य गर्ने भन्ने विषयमा नेतृत्व तहमै फरक धारणा देखिएको हो।
एकता प्रक्रिया अघि बढाउन जसपाले संघीय परिषद् अध्यक्ष राजेन्द्र श्रेष्ठको नेतृत्वमा कार्यदल गठन गरेको छ। यही कार्यदलले शनिबार एकीकृत समाजवादीसँग वार्ता गरेको थियो।
वार्ता सकारात्मक भएकाले आइतबार पनि पेरिसडाँडामा अपराह्न ४ बजे बैठक बस्ने तयारी रहेको अध्यक्ष श्रेष्ठले जानकारी दिए।
श्रेष्ठ नेकपा (एकीकृत समाजवादी)सँग नै एकता गरेर अघि बढ्नु उपयुक्त हुने पक्षमा छन्।
तर महासचिव मोहम्मद इस्तियाक राई, उपमहासचिव प्रदीप यादवलगायतका केही नेताहरू भने मधेस केन्द्रित दलहरूसँग नै सहकार्य गर्दै अगाडि जानुपर्ने पक्षमा छन्।
एक नेताका अनुसार, शीर्ष बैठकमा मिश्रित धारणा आएको भए पनि पार्टी अध्यक्ष अशोक राईले अहिलेसम्म आफ्नो स्पष्ट मत सार्वजनिक गरेका छैनन्।
जसपा उपेन्द्र यादव नेतृत्वको जसपा नेपाल, राजेन्द्र महतो नेतृत्वको राष्ट्रिय मुक्ति पार्टी लगायत मधेस केन्द्रित दलसँग पनि समानान्तर रूपमा छलफलमा छ।
