फ्रेन्च क्लब पेरिस सेन्ट जर्मेन (पीएसजी) च्याम्पियन्स लिग फुटबलको क्वाटरफाइनलमा प्रवेश गरेको छ । बुधबार राति घरेलु मैदानमा भएको अन्तिम १६ को दोस्रो लेगमा पीएसजीले बोरुसिया डर्टमण्डलाई २–० गोल अन्तरले पराजित गर्दै समग्रमा ३–२ को जितसहित अन्तिम आठमा पुगेको हो । पीएसजीलाई जित दिलाउन नेयमार र जुवान बर्नाटले एक एक गोल गरे ।
१० खेलाडीमा सिमित बनेको डर्टमण्डविरुद्ध खेलमा नेयमारले २८ औं मिनेटमा गरेको गोलबाट पीएसजीले अग्रता बनाएको थियो । त्यसपछि खेलको ४५ औं मिनेटमा बर्नाटले गोल गर्दै पीएसजीलाई २–० को जित दिलाए ।
यस्तै खेलको ८९ औं मिनेटमा इम्री क्यानले रातो कार्ड पाउँदा डर्टमण्ड अन्तिम केहि समय १० खेलाडीमा समेटिएको थियो । उनले नेयमारलाई खराब ट्याकल गरेका थिए ।
