काठमाडौं । धुर्मुस–सुन्तली फाउन्डेसनको पहलमा भरतपुरमा निर्माण सुरु भएको गौतम बुद्ध अन्तर्राष्ट्रिय क्रिकेट रंगशालाको छैटौं प्राविधिक मूल्याङ्कनमा पनि कुनै कैफियत नभेटिएको पाइएको छ।
पुल्चोक इन्जिनियरिङ अध्ययन संस्थानले गरेको पछिल्लो मूल्याङ्कनअनुसार रंगशालामा भ्याटसहित करिब ५९ करोड ९० लाख रुपैयाँ बराबरको काम भएको देखिएको छ।
सरकारले चालू आर्थिक वर्षको बजेटमार्फत पुल्चोक क्याम्पसको मूल्याङ्कनका आधारमा सम्पत्ति खरिद गर्न १५ करोड रुपैयाँ विनियोजन गरी अर्थ मन्त्रालयले असारमै भरतपुर महानगरपालिकालाई निकासा गरिसकेको छ।
प्रतिवेदनले धुर्मुस–सुन्तली फाउन्डेसनले खर्चभन्दा बढी मूल्यको भौतिक संरचना निर्माण गरेको देखाएको छ। महानगरको लेखापरीक्षणअनुसार ५७ करोड ९२ लाख रुपैयाँ खर्च भएको र करिब १८ करोड ४३ लाख रुपैयाँ आपूर्तिकर्तालाई तिर्न बाँकी रहेको उल्लेख छ।
संस्थानको प्रतिवेदनमा माटो ढुवानी, दुबो रोपाइँ र नमुना खेलमैदानलगायत करिब ३ करोड रुपैयाँ बराबरका खर्च समावेश छैनन् । ती जोड्दा र ओभरहेड कस्ट समेत गणना गर्दा रंगशालाको कुल मूल्य करिब ७२ करोड रुपैयाँ पुग्छ।
यो परियोजनामा हालसम्म पाँचपटक सरकारी छानबिन भइसकेको छ । सबै मूल्याङ्कनले कुनै अनियमितता नभएको निष्कर्ष दिएको छ। धुर्मुसविरुद्ध दायर उजुरीमा अख्तियार दुरुपयोग अनुसन्धान आयोगले पनि २०८१ सालमा ‘क्लिनचिट’ दिएको थियो।
तर, भरतपुर महानगरले संघीय सरकारबाट निकासा भएको १५ करोड रुपैयाँ फाउन्डेसनलाई अझै हस्तान्तरण गरेको छैन। यस कारण धुर्मुसले ठेकेदार र आपूर्तिकर्तालाई तिर्न बाँकी १८ करोड रुपैयाँको ऋण चुक्ता गर्न नसकेको बताइएको छ।
