यात्रु जाँच गर्ने स्वास्थ्यकर्मीलाई छैन तालिम
विश्वमा फैलिरहेको नोबल कोरोना भाइरस भित्रन नदिन भारतसँग सीमा जोडिएको पूर्वी नाका काँकडभिट्टामा उच्च सतर्कता बढाइएको छ । नेपालको पूर्वी नाका काँकडभिट्टा र भारतको पानीट्यांकी नाकामा सबै यात्रुको ज्वरो जाँच गर्न सुरु गरिएको छ । यसअघि काँकडभिट्टामा रहेको कोरोना परामर्श केन्द्रका स्वास्थ्यकर्मीले शंका लागेका व्यक्तिको मात्र ज्वरो नप्दै आएका थिए । तर, शनिबारदेखि भारतबाट नेपालतर्फ आउने प्रत्येक यात्रुको ज्वरो जाँच गर्न सुरु गरिएको छ । भारतले पनि नेपालबाट जाने प्रत्येक पैदल यात्रु र गाडीमा जाने यात्रुको ज्वरो नाप्न सुरु गरेको छ ।
दुवैतर्फ एकाएक जाँच गर्दा नेपाल–भारत सीमाको मेचीपुलमा शनिबार र आइतबार दिनभर सवारी जाम भए । जाँचलाई अझ प्रभावकारी बनाइने मेचीनगर नगरपालिकाकी उपप्रमुख मीना उप्रेतीले बताइन् । ‘शनिबारबाट नाका भएर आउने सबै यात्रुको ज्वरो नाप्न सुरु गरेका छौँ,’ उनले भनिन्, ‘यसले गर्दा संक्रमणको जोखिम न्यून गर्न सकिन्छ ।’ काँकडभिट्टा नाकासहित जिल्ला प्रशासन कार्यालय र जिल्ला स्वास्थ्य कार्यालयले स्थानीय तहको समन्वयमा झापाका ६ स्थानमा कोरोना हेल्प डेस्क राखिएको छ ।
काँकडभिट्टासँगै गौरीगन्ज, भद्रपुर नाका, भद्रपुर विमानस्थल, झापा गाउँपालिकाको कुरमखोद नाका र कचनकवलको बनियानीमा परामर्श केन्द्र राखिएको स्वास्थ्य कार्यालय झापाका स्वास्थ्य संयोजक जीवन चम्लागाईंले जानकारी दिए । ‘यी नाकामा ज्वरो नाप्न इन्फ्रारेड थर्मोमिटर छ । स्वास्थ्यकर्मीले शरीरमा नछोई ज्वरो जाँच्छन्,’ उनले भने, ‘ज्वरोसँगै खोकी आए/नआएको र रुघा लागे नलागेको सोध्ने गरेका छौँ ।’ प्रत्येक यात्रुको स्वास्थ्य जाँच गर्न थालेपछि ज्वरो जाँच अस्तव्यस्त देखिएको छ । भारततर्फबाट आएका नेपाली वा अन्य मुलुकका सबैको ज्वरो जाँच गर्नुपर्दा अव्यवस्थित भएको छ ।
यात्रुुको भिडका कारण स्वस्थ्यकर्मीले राम्ररी जाँच गर्न पाएका छैनन् । भिडभाडमा हतार–हतार नै उनीहरूको ज्वरो जाँच भइरहेको छ सयौँ यात्रुलाई जाँच गर्न दुईजना स्वास्थ्यकर्मी मात्र परिचालित छन् । तर, मेचीनगरकी उपप्रमुख उप्रेतीले जनशक्ति कम हुन नदिने बताइन् । ‘हामीले थप स्वास्थ्यकर्मी नाकामा खटाएका छौँ । केही स्वास्थ्यकर्मी नगरमा दैनिक ज्यालादारीमा पनि ल्यायौँ,’ उनले भनिन्, ‘कोरोना चेकजाँचमा जनशक्तिको कमी हुन दिँदैनौँ ।’तर, एकैपटक यात्रुको ज्वरो नाप्दा कोरोना सर्ने खतरा भएको भने उनले स्वीकार गरिन् । ‘
हामीले सबैको ज्वरो नाप्न शनिबारबाट सुरु गरेका हौँ । हामीले नै भिडभाडमा नजाऔँ भनिरहेका वेला यसले खतरा त ल्याएको छ,’ उनले भनिन्, ‘सर्वदलीय बैठक पनि बसिसकेका छौँ । छिट्टै महिला, पुरुष, अशक्तलगायतको छुट्टै लाइन बनाएर व्यवस्थित गर्छौँ ।’ झापाका ६ वटै नाकामा खटाइएका स्वास्थ्यकर्मीलाई तालिम दिइएको छैन ।
उनीहरूलाई सामान्य प्रचार र पम्प्लेटका भरमा यात्रुलाई कोरोना जाँच्न खटाइएको छ । कोरोनाबारे आधारभूत तालिम दिनुपर्ने मेची अस्पताल (पहिलाको अञ्चल अस्पताल)का मेडिकल सुपरिटेन्डेन्ट डा। पीताम्बर ठाकुर बताउँछन् । ‘महिला महामारी रोगका बारेमा तालिम लिएकाले त जसोतसो गर्छ । तर, नयाँलाई थाहा हुँदैन,’ उनले भने, ‘त्यसकारण तालिम त दिनुपर्छ ।’ नयाँ पत्रिका दैनिक
