काठमाडौं। जेन–जी आन्दोलनका प्रतिनिधिहरूले राजनीतिक दल, आईएनजीओ र एनजीओबाट फण्डिङ केही जेन–जी समूहहरुले आन्दोलनका मूल मुद्दा कमजोर पार्ने प्रयास गरिरहेको आरोप लगाएका छन्।
आईतवार काठमाडौंमा आयोजित ‘ऐतिहासिक जेन–जी आन्दोलन र परिवर्तनको मार्गचित्र’ विषयक गोष्ठीमा बोल्दै उनीहरुले यस्तो आरोप लगाएका हुन् । जेन–जी समूहहरुको विभागजन र स्वार्थी प्रवृत्तिका कारण जेन–जी आन्दोलनको औचित्यमाथि नै शंका उत्पन्न हुन थालेकोप्रति उनीहरुले चिन्ता व्यक्त गरे । जेन–जी प्रतिनिधि अबिन मयाङ्बोले भ्रष्टाचार नियन्त्रण, सुशासन कायम लगायत तीन वटा मुद्दा लिएर आन्दोलन सुरु गरिएको भएपनि केही जेन–जी समूहहरु सत्ताकै पछि दौडिरहेको आरोप लगाउनु भयो । उहाँले जेन–जी आन्दोलनले उठाएका मागहरु पूरा गर्न आफूले एकताका लागि आह्वान गरेको भएपनि कोही जेन–जी समूह वा व्यक्ति सहभागि नभएको भन्दै आक्रोश व्यक्त गर्नुभयो।
उहाँले भन्नुभयो, ‘हामीले तीन वटा मुद्दा बोकेर आन्दोलन गरेका हौं। तीनज मुद्दाबाट केही जेनजी अगुवा भन्नेहरुले चार वटामा किन सारिराखेको ? हामीले हिजो मात्रै पनि जेनजी समूहको एकताका लागि प्रयास गर्यौं । सबैलाई आह्वान ग¥यौं कोही आउनुभएन । उहाँहरु स्वार्थी समूहहरु हो । उहाँहरु आउनुहुन्न । जेन–जी भन्नेहरुलाई पार्टी, एनजीओ र आईएनजीओहरुले पछाडिबाट फण्डिङ गरेको छ। आयो भने भोलिको दिनमा फण्डिङ रोकिन्छ । त्यसकारण एकता सम्भव छैन । यदि एकताका लागि सबै जेन–जी समूहहरु आउनुहुन्छ भने हामी एकताका लागि तयार छौं।’
जेन–जीकी अर्की प्रतिनिधि अञ्जु राईले आन्दोलनका शहीदहरूको बलिदान व्यर्थ हुन नहुने धारणा राख्नुभयो। उहाँले २०८४ सालमा हुने आवधिक निर्वाचनलाई २०८२ सालमा गर्नको लागि मात्र आफूहरुले आन्दोलन नगरेको स्पष्ट पार्नुभयो । उहाँले जेन–जी आन्दोलनले उठाएका मागहरु सम्बोधन नभए फेरी आन्दोलनमा जाने चेतावनी समेत दिनुभयो। उहाँले जेन–जी पुस्ताका माग सम्बोधन गर्न तथा शहीदका परिवारलाई राहत तथा क्षतिपूर्ति दिन माग गर्दै प्रधानमन्त्रीलाई लिखित निवेदन दिएपनि सरकारले गम्भीरता नदेखाएको आरोप लगाउनु भयो।
उहाँले भन्नुभयो, ‘२०८४ सालमा हुने चुनाव २०८२ मै गर्नको लागि त हाम्रा साथिहरु रगत बगाउनु भएको होइन । चुनाव मात्रै गरेर देशको अहिलेको समस्याहरु हल हुन्छन् त ? हाम्रा कतिपय साथिहरु जेनजीहरुको युनिफिकेसनको लागि कामहरु गरिरहनुभएको छ। यदि जेनजीले उठाएका मागहरु सम्बोधन हुने स्थिति भएन भने सबै जेन–जी समूह मिलेर हामी फेरि आन्दोलन गर्नुपर्ने स्थिति आउनसक्छ । हामीले जेजनीका माग र शहीदलाई न्याय दिनको लागि प्रधानमन्त्रीज्यूलाई निवेदन दियौं तर उहाँहरुको आश्वासन फिक्का हुँदै गइरहेका छन्।’
त्यस्तै, ज्योतिका फुर्केलीले जेन–जी पुस्ता आपसी विभाजनको मार्गमा हिँडेकै कारण पुराना राजनीतिक शक्तिहरू शिर उठाउन थालेको बताउनु भयो। उहाँले जेन–जी आन्दोलनले निकास नपाए समाजमा जेन–जी पुस्ता आतंककारी ठहरिने भन्दै यसप्रति सबै सचेत हुनुपर्ने बताउनु भयो। उहाँले मुलुकमा सुशासन कायम गर्नको लागि जेनजीबीको एकताको विकल्प नरहेको जिकिर पनि गर्नुभयो।
उहाँले भन्नुभयो, ‘हामी ले मुलुकको आमुल परिवर्तनको लागि आन्दोलन ग¥यौँ। अहिले जेन–जी अभियानहरु नै एकआपसमा बाँझिदा पुरानै राजनीतिक शक्तिहरु राज्यसत्तामा आउन तयारी अवस्थामा छन्। हामी जेन–जीहरुलाई त उनीहरुले अहिले नै आतंककारी घोषणा गरिसकेका छन्। अहिले गाउँमा जेनजी भन्यो भने आतंककारी भन्ने स्थिति सिर्जना हुनुमा हामीहरुकै हात छ नि। त्यसैले अब हामी सबै एकजुट भएर जेनजी आन्दोलनका मागहरु पूरा गर्नतर्फ अगाडि बढ्नुपर्छ ।’
फुर्केलीले सबै जेन–जी समूहलाई एकजुट भई मूल आन्दोलनका माग पूरा गर्नतर्फ लाग्न आह्वान समेत गर्नुभयो।
