काठमाडौं । सिंहदरबारमा संघीय र प्रदेश संसदका पदाधिकारीहरूको संयुक्त बैठक जारी रहेको छ ।
सिंहदरबारस्थित राज्य व्यवस्था तथा सुशासन समितिको बैठक कक्षमा प्रतिनिधिसभाका सभामुख, उपसभामुख, राष्ट्रियसभाका अध्यक्ष, उपाध्यक्ष र सातवटै प्रदेशका सभामुख, उपसभामुख बैठक बसिरहेका छन् ।
जेनजी आन्दोलनपछिको विकसित घटनाक्रम, संसद विघटन भएको अवस्थामा सभामुख उपसभामुखको भूमिका, प्रदेश सभाका कामकारबाही र आगामी योजनाबारे छलफल हुने बताइएको छ ।
जेनजी आन्दोलनपछि बनेको सरकारले खर्च कटौती भन्दै संघीय संसद्का पदाधिकारी तथा सांसदले पाउँदै आएको कर्मचारी कटौतीको निर्णय गरेको थियो । सरकारको निर्णयपछि प्रतिनिधिसभाका सभामुख देवराज घिमिरे, राष्ट्रिय सभाका अध्यक्ष नारायणप्रसाद दाहालसहित प्रतिनिधिसभाका उपसभामुख, राष्ट्रिय सभाका उपाध्यक्ष, संसद् सचिवालयका महासचिवलगायतका पदाधिकारीहरुले १७ कात्तिकमा प्रधानमन्त्रीसँग भेटेरै असन्तुष्टि जनाएका थिए । आज यसबारेमा पनि छलफल हुने बताईएको छ ।
आजको छलफलपछि संघ र प्रदेशका पदाधिकारीले आज राष्ट्रपतिलाई र भोलि शनिबार प्रधानमन्त्रीलाई सामूहिक भेट गर्ने तयारी गरेका छन् ।
