काठमाडौं उपत्यकामा पेट्रोलियम पदार्थ, ग्यास, मास्क, सेनिटाइजरलगायत दैनिक उपभोग्य वस्तु असमान बिक्रीवितरण तथा कालोबजारी गर्नेलाई तत्कालै कारबाही गर्न महानगरीय प्रहरी कार्यालयले निर्देशन दिएको छ। मंगलबार साँझ उपत्यकाका सबै प्रहरी युनिटलाई तत्काल छापा मारी कारबाही प्रक्रिया अगाडि बढाउन महानगरीय प्रहरी कार्यालयका प्रमुख प्रहरी नायब महानिरीक्षक विश्वराज पोखरेलले निर्देशन दिएका छन्। उनले कोही कसैले असमानरूपमा बिक्रीवितरण गरेको भन्ने सूचना आएकाले तत्काल छापा मारी कानुनअनुसार कारबाही गर्न निर्देशन दिएको बताए। मंगलबार मात्रै बजारमा पेट्रोलिय पदार्थको हाहाकार भएको थियो भने खाना पकाउने ग्यास नपाएर कतिपय उपभोक्ताको चुलो बलेको थिएन।

कोरोना भाइरसका कारण देखाउँदै बजारमा कालोबजारी शुरू भएको र व्यापारीले मौकाको फाइदा उठाउँदै दैनिक उपभोग्य वस्तुमा मूल्य वृद्धि गर्नुका साथै बिक्रीवितरणमा असहजता ल्याएका थिए। तेलको स्वचालित मूल्य निर्धारण प्रणालीका कारण घाटा पर्ने त्रासले व्यापारीले पेट्रोलियम आयत गरेका थिएनन्। सरकार पनि बजार व्यवस्थापनमा चुकिरहेको थियो। हवाई इन्धनसहित पेट्रोलियम पदार्थको मूल्य घटेको छ। नेपाल आयल निगमले सोमबार राती १२ बजेदेखि लागू हुने गरी पेट्रोल, डिजेल र मट्टीतेलमा प्रतिलिटर दुई रुपियाँ घटाएको छ। यससँगै काठमाडौं उपत्यकामा पेट्रोल प्रतिलिटर १ सय ६ रुपियाँ र डिजेल तथा मट्टीतेल प्रतिलिटर ९५ रुपियाँ कायम गरिएको छ।

यसैगरी आन्तरिक हवाई इन्धनतर्फ प्रतिलिटर ४ रुपियाँ ५० पैसाले घटाई प्रतिलिटर ९० कायम गरिएको छ। खाना पकाउने एलपी ग्यास र बाह्य उडानतर्फको हवाई इन्धनको मूल्य भने यथावत् राखिएको छ। यति गर्दा पनि बजारमा कालोबजारी तथा असमान वितरण नरोकिएकाले उपत्यकाका काठमाडौं, ललितपुर तथा भक्तपुरका सबै प्रहरी युनिटलाई छापा मारी कालोबजारी नियन्त्रणमा लिन निर्देशन दिइएको महानगरीय प्रहरी प्रमुख पोखरेलले बताए। नेपाल समाचारपत्र दैनिक