काठमाडौं । सरकारले एसईईलगायत चैत्र महिनामा सञ्चालन हुने सबै परीक्षा स्थगित गरेको छ । कोरोनाको संक्रमण बढ्ने खतराका कारण सरकारले सबै परीक्षा स्थगित गर्न निर्देशन दिएको हो ।शिक्षा, विज्ञान तथा प्रविधिमन्त्री गिरिराजमणि पोखरेलले एसईईसहित चैत्रमा हुने सिटिइभिटी र त्रिभुवन विश्वविद्यालयका सबै परीक्षा स्थगित गर्ने निर्णय भएको जानकारी दिए । बिहिबारबाट हुने एसईई परीक्षाका लागि सबै तयारी पूरा भईसकेपछि सरकारले स्थगित गरेको हो । परीक्षा हुनुभन्दा १२ घण्टा अगाडी मात्र परीक्षा स्थगित भएको सूचना विद्यार्थीले पाएका थिए । सम्पूर्ण तयारी पूरा गरेर बसेकाहरू भने अन्यौलमा देखिएका थिए ।
एसइई परीक्षामा देशभरबाट चार लाख ८५ हजार ५८६ परीक्षार्थी सहभागी हुँदैथिए । सरकारले अर्को सूचना जारी नभएसम्मका लागि परीक्षा स्थगित गरेपछि विद्यार्थी अन्यौलमा परेका छन् । तर, मन्त्रालय स्रोतका अनुसार वैशाख मध्य वा अन्तिममा परीक्षाहरू सञ्चालन हुन सक्नेछन् । कोरोनाको प्रभाव कम हुनेबित्तिकै रोकिएका परीक्षाहरू यथावत रूपमा सञ्चालनमा आउने जानाइएको छ । कोरोना रोकथाम समितिले परीक्षा सञ्चालन गर्ने तयारी गरेपनि नेकपाको सचिवालय बैठकले परीक्षा समेत रोक्न सुझाव दिएको थियो । सो सुझाव पाए लगत्तै सबै परीक्षा स्थगित गर्ने निर्णयमा सरकार पुगेको हो ।
त्रिविबाट सञ्चालन हुने गरी तयारी अवस्थामा रहेका सबै परीक्षा पनि अर्को सूचना प्रकाशित नभएसम्मका लागि स्थगित भएको छ । राष्ट्रिय परीक्षा बोर्डले लिने कक्षा ११ र १२ को परीक्षा भने एक महिनापछि हुने भएकाले हाललाई कुनै निर्णय लिइएको छैन । यसअघि विश्वविद्यालयको परीक्षासम्बन्धमा निर्णयका लागि बिहीबार पदाधिकारीलाई छलफलका लागि शिक्षा मन्त्रालयमाबोलाउने भनिएको थियो । तर, केही घन्टापछि परीक्षा रोक्ने निर्णय भएको हो ।
यसैबीच, चैत मसान्तसम्म बाल विकास केन्द्र, आधारभूत तथा माध्यमिक विद्यालय तथा विश्वविद्यालयका पठनपाठन बन्द गर्ने निर्णय गरेको छ । समितिले विश्वविद्यालयसहित बाल विकास केन्द्र, आधारभूत तथा माध्यमिक विद्यालयहरु र ११ वटै विश्वविद्यालयहरुको पठनपाठन चैत मसान्तसम्म बन्द गर्ने निर्णय गरेको हो । सौर्य दैनिक
